Аргентины Дэд Ерөнхийлөгч Кристина Фернандес де Киршнер гэрийнхээ гадаа дэмжигчидтэйгээ мэндчилж байх үеэр түүний нүүрэнд буу тулгасан этгээдийг цагдаа нар баривчилжээ. Тус улсын Эдийн засгийн сайд Сержио Масса энэхүү явдлыг "аллагын оролдлого" гэж нэрлэсэн байна. 

Олон нийтийн сүлжээнд тавигдсан бичлэгээс харахад, нэгэн этгээд ойрын зайнаас хатагтай де Киршнерийн нүүр рүү буу чиглүүлсэн ч галлаагүй бөгөөд цугласан олон түүнийг халдагчаас халхлахыг оролдож байжээ. Дэд Ерөнхийлөгч энэ хэргийн улмаас бэртэж гэмтээгүй гэж албаныхан мэдээлсэн юм.

El video del arma contra @CFKArgentina pic.twitter.com/8j1xpMnPoe

— Lautaro Maislin (@LautaroMaislin) September 2, 2022

Орон нутгийн цагдаа нар "зэвсэглэсэн" этгээдийг баривчилсан бөгөөд "хэргийн газраас хэдхэн метрийн зайд галт зэвсэг олсон" гэж албаны эх сурвалж "Ройтерс" агентлагт хэлжээ. Мөн халдагч нь Бразил гаралтай байж магадгүйг дурдсан байна.

Кристина Фернандес де Киршнер нь авлигын хэрэгт холбогдон, сүүлийн өдрүүдэд шүүх хуралд оролцож байгаа билээ. Бүх гэм буруугаа үгүйсгэж буй түүний дэмжигчид Буэнос-Айрес дахь гэрийнх нь гадна олон зуугаараа цуглах болоод байгаа юм. 2007-2015 оны хооронд Ерөнхийлөгчөөр ажиллаж байхдаа төсвийн мөнгийг залилсан хэрэгт буруутгагдаж буй хатагтай де Киршнерийн гэм буруутай нь нотлогдвол тэрээр 12 жилийн хорих ял сонсож, бүх насаараа улс төрд оролцох боломжгүй болох юм.

Эх сурвалж: BBC

---