Испанийн Каталони бүсийн Жиронад 10 см хүртэлх голчтой мөндөр орж, байгалийн гамшигт үзэгдэл болох үеэр ой найман сартай хүүхэд мөндөрт цохиулж нас барсан харамсалтай хэрэг гарсан бөгөөд 50 орчим хүн бэртэж гэмтсэнийг албаныхан мэдээлжээ.

Орон нутгийн цагаар мягмар гаргийн орой 10 минутын турш үргэлжилсэн хүчтэй аадар бороо, мөндөр нь байшингуудын дээврийг эвдэлж, эрчим хүчний шугамуудыг нураан, автомашинуудын цонхыг хагалсан байна. Эдгээр мөндрийн нэг нь 10 см-ийн голчтой байсныг Каталоны Цаг уурын албанаас мэдээлсэн бөгөөд энэ нь тус бүс нутагт 2002 оноос хойш бүртгэгдсэн хамгийн том мөндөр юм.

Энэхүү байгалийн гамшигт үзэгдлийн үеэр гал сөнөөгчид 40 гаруй дуудлага хүлээн авсан эдгээрийн ихэнх нь Бисбал д'Эмпорда хотоос ирсэн байна. Тус хотод оршин суудаг бага насны нэг хүүхэд толгойдоо мөндөрт цохиулсны дараа яаралтай тусламжийн албаныхан түүнийг ойролцоох Жирона хотын эмнэлэгт хүргэсэн боловч тэрээр шархаа даалгүй нас баржээ.

Бүс нутгийн эрх баригчид одоо цаг агаарын аюулын сэрэмжлүүлгийг дахин зарлаж, далайн эрэг орчмын хэсэгт дахиад их хэмжээний мөндөр орж болзошгүйг анхааруулаад байна. Энэ зун ер бусын халуун байсны улмаас Газар дундын тэнгис ердийнхөөс илүү халж, улмаар хүчтэй шуурга дэгдэх магадлалыг нэмэгдүүлсэн аж.

En concret, el nostre observador de la XOM a la Bisbal d'Empordà (el Baix Empordà) ha registrat un diàmetre màxim de pedra de fins a uns 10 cm. pic.twitter.com/oCpUQlRKfL

— Meteocat (@meteocat) August 30, 2022

Эх сурвалж: BBC

---