Европын Холбооны Гадаад хэргийн сайд нар өнгөрөгч наймдугаар сарын 30-31-ний өдрүүдэд хуралдсаны эцэст ОХУ-тай байгуулсан визийн хэлэлцээрийг зогсоохоор шийдвэрлэснээр оросуудын виз авах хугацаа уртсаж, илүү үнэтэй болоод байна. Украин болон зарим гишүүн орон визийн бүрэн хориг тавихыг уриалсан ч Франц, Герман зэрэг бусад орон үүнийг эсэргүүцсэн юм.

Украин дахь хурцадмал байдал энэ оны хоёрдугаар сард эхэлснээс хойш Оросын нэг сая гаруй иргэн ЕХ-ны улсуудад зорчжээ. ОХУ-аас хилээр нэвтрэх иргэдийн тоо тодорхой хэмжээнд нэмэгдсэн тул визийн хэлэлцээрийг зогсоох шаардлагатай болсныг ЕХ-ны Гадаад бодлогын дээд төлөөлөгч Жозеп Боррел мэдэгдсэн. Тэрээр "Орос иргэдийн энэхүү хөдөлгөөн нь хөрш орнуудын аюулгүй байдлын эрсдэл болсон. Үүнээс гадна, олон орос хүн Украинд дайн болоогүй юм шиг Европт амарч зугаалж, дэлгүүр хэсэж байна" хэмээжээ.

Гэвч Оросын түрэмгийллийг эсэргүүцэж буй иргэд болон "иргэний нийгэм"-ийг тусгаарлахгүй байх нь чухал гэдгийг ноён Боррел мөн онцолсон юм. Украины Гадаад хэргийн сайд Дмитрий Кулеба энэхүү үр дүнг "хагас арга хэмжээ" гэж шүүмжилсэн бол ОХУ-ын Гадаад хэргийн дэд сайд Александр Глушко ЕХ-г "хөл рүүгээ буудсан" шийдвэр гаргасан гээд, хариу барихаа анхааруулсан байна.

Харин ОХУ-тай хиллэдэг улс орнууд визтэй иргэдийн нэвтрэх эрхийг ч хязгаарлах боломжтой бөгөөд Финланд, Эстони, Латви, Литва болон Польш улсууд хамтарсан мэдэгдэлдээ "Олон нийтийн аюулгүй байдлын тулгамдсан асуудлыг шийдвэрлэхийн тулд түр хугацаагаар хориг, хязгаарлалт тогтоож магадгүй" гэжээ.

Эх сурвалж: BBC

---