Засгийн газрын хуралдаанаас гаргасан шийдвэрийн талаар ЗГХЭГ-ын дарга Д.Амарбаясгалан мэдээлэл хийлээ. 

ЗГХЭГ-ын дарга Д.Амарбаясгалан: 

-Монгол улсын Засгийн газрын баримталж байгаа нэгэн чухал бодлого нь төрийн бүтээмжийг дээшлүүлэх, гаргасан бодлогоо сайтар хэрэгжүүлэх, төр-төр хоёрын харилцааг ойртуулахад чиглэж байна. 

2022 оны дөрөвдүгээр сарын 29-нд батлагдсан Төрийн хэмнэлтийн тухай хуулиар 2022 онд 5.8 тэрбум төгрөг хэмнэх тооцоо гарсан. Дэд дарга болон зөвлөх нарын нийт 159 албан тушаалтныг чөлөөлж, 1.4 тэрбум төгрөг хэмнэсэн. Төрийн үйлчилгээнд явж байсан 587 автомашиныг Засгийн газрын авто баазад хүлээлгэн өгсөн. Автомашинуудын урсгал зардалд төсөвлөгдсөн байсан 268 сая төгрөг хэмнэгдсэн. 

-Сайд нарыг дэд сайд болгосон байна. Ямар хүчин зүйлийг харгалзан үзэж ийм томилгоо хийсэн бэ? 

-Уул уурхай, хүнд үйлдвэрийн сайд Г.Ёндонгийн хувьд салбартаа 30 шахам жил ажиллаж байгаа уул уурхайн мэргэжлийн хүн. Эрдэнэт үйлдвэр, Эрдэнэс Монгол зэрэг төрийн томоохон үйлдвэрүүд мэргэжлийн удирдлагаар хангагдаж байх ёстой. Сайд хийж байсан туршлагатай хүн салбарын бодлого, шийдвэрээ Засгийн газрын түвшинд ойлгуулдаг байх ёстой.  

Эрдэнэт үйлдвэрийн ерөнхий захирал байсан Х.Бадамсүрэнг Эрдэнэс Монголын, цаасан дээр байгуулагдаад байгаа Зэсийн группийн ажлыг явуул, гардан зохион байгуул гэж томилсон. 

Зам, тээвэр хөгжлийн сайд Л.Халтарыг дэд сайдаар томилсон. Хүндрэлтэй үед сайдаар ажилласан. Алдаа оноо гарсан гэж үзвэл өөрөөс нь хамаарах асуудал байсан уу гэвэл хүндрэлтэй. Төмөр замд цэвэрлэгчээс сайд хүртэл ажилласан хүн энэ салбарт хэрэгтэй. 

Ер нь Монгол улсын Засгийн газар дэд сайд нарыг сэлгэн ажиллуулах бодлого баримталж байгаа. Сингапурт ийм жишиг байдаг. 

-Яамгүй хоёр сайдын ажлын албанд хэдэн хүн ажиллах вэ? 

-Спортын сайдын ажлын алба гурван хүний бүрэлдэхүүнтэй байх урьдчилсан тооцоо гарсан. Замын түгжрэлийг бууруулах хотын сайдын хувьд арай өргөн хүний бүрэлдэхүүнтэй ажиллана гэв. 

---