Европ даяарх байгалийн хийн хомстол ирэх хэдэн өвлийн турш үргэлжлэх төлөвтэй байгааг "Shell" компанийн Гүйцэтгэх захирал Бен ван Берден анхааруулжээ.

Тэрээр өнгөрөгч даваа гарагт Норвегид болсон хэвлэлийн бага хурлын үеэр "Энэ байдал олон жил үргэлжилж магадгүй бөгөөд бид хэд хэдэн өвлийн турш ямар нэгэн шийдэл олох шаардлагатай болно. Хатуу хэмнэлт, хязгаарлалтаас гадна нөөц хувилбаруудыг түргэн шуурхай бий болгох замаар эрчим хүчний хямралыг шийдвэрлэх боломжтой" хэмээн мэдэгдсэн байна.

Украинд үүссэн нөхцөл байдлын улмаас Оросын байгалийн хийн нийлүүлэлт тасарсан нь Европын орнуудыг эрчим хүчний ноцтой хямралд оруулсан ба улмаар бөөний үнэ огцом өсөж, 1980-аад оноос хойших хамгийн өндөр инфляц нүүрлэн, тив даяарх айл өрх, аж ахуйн нэгжүүд том дарамтад ороод байгаа билээ. Иймээс Европын томоохон эдийн засагтай орнууд инфляцын цаашдын өсөлт, болзошгүй эдийн засгийн уналтын аюултай хүнд хэцүү өвөлд бэлдэж байна.

Украин дахь түрэмгийлэл эхлэхээс өмнө ЕХ-ны ихэнх орны байгалийн хийн гол нийлүүлэгч нь ОХУ байсан ч тус улс нь Барууны орнуудын хориг арга хэмжээний хариуд экспортоо зогсоосон. Хэдийгээр ЕХ-ны бүх орон Оросын нийлүүлэлтээс шууд хамааралтай биш ч ховор нөөцийн төлөөх өрсөлдөөн улам ширүүсэж, бөөний үнэ өсөхөд хүргээд байгаа юм. Тэгвэл Европын Комиссын Ерөнхийлөгч Урсула фон дер Лейен яаралтай арга хэмжээний багцыг удахгүй танилцуулна гэж даваа гарагт мэдэгджээ.

Эх сурвалж: The Guardian

---