Монгол Улсын Үндсэн хуульд оруулах өөрчлөлтийн төслийг өнөөдөр Н.Энхболд нарын 62 гишүүн Монгол Улсын Их Хурлын дарга Г.Занданшатарт өргөн мэдүүлсэн.

Тодруулбал, Монгол Улсын Үндсэн хуулийн Хорин зургадугаар зүйлийн 1 дэх хэсэг, Монгол Улсын Үндсэн хуульд нэмэлт, өөрчлөлт оруулах журмын тухай хуулийн 18 дугаар зүйлийн 1 дэх хэсэг, Монгол Улсын Их Хурлын тухай хуулийн 8 дугаар зүйлийн 8.1.1-т заасан бүрэн эрхийнхээ хүрээнд Үндсэн хуульд оруулах өөрчлөлтийн төслийг өргөн барьсан юм.

Ийнхүү Үндсэн хуульд оруулах өөрчлөлтийн төслийг УИХ-ын ээлжит бус чуулганы хуралдаанаар хэлэлцэж эхэллээ.

Үндсэн хуульд оруулах өөрчлөлтийн төслийн нэг дэх хэлэлцүүлгийг явуулсан талаар УИХ-ын Төрийн байгуулалтын байнгын хорооны санал дүгнэлтийг ТББХ-ны дарга Ж.Мөнхбат уншиж танилцуулав.

Энэ үеэр УИХ-ын гишүүн Д.Ганбат хуулийн төслийг эсэргүүцэж, индэрийн хажууд гарч ирэв. Улмаар УИХ-ын гишүүн Д.Ганбатыг УИХ-ын чуулганы хуралдааны дэгийг сахихыг УИХ-ын дарга Г.Занданшатар сануулав.

---