Германы канцлер Олаф Шольц Канадад хийж буй албан ёсны айлчлалынхаа хүрээнд Ерөнхий сайд Жастин Трюдотой уулзаж, тус улсаас эрчим хүчний нийлүүлэлт авах боломжийн талаар ярилцжээ.

ОХУ-ын газрын тос, байгалийн хийнээс хамааралтай байдлаа яаралтай зогсоохоор төлөвлөж байгаа Герман улс эрчим хүчний шинэ хангамжид нэвтрэхийг эрмэлзэж байгаа юм. Иймээс тус улс нь импортоо нэмэгдүүлэхийн тулд шингэн байгалийн хийн боомтын дэд бүтэц, дамжуулах хоолойн бүтээн байгуулалтыг яаравчлахаас гадна олборлолтоо нэмэгдүүлэх үүднээс Канад зэрэг бусад улс оронтой холбоо тогтоож байгааг ноён Щольц Монреаль хотод болсон хамтарсан хэвлэлийн бага хурлын үеэр хэлсэн байна.

Германд үүсээд буй эрчим хүчний шилжилтийн үед илүү их шингэн байгалийн хий хэрэгтэйг тэрээр мөн онцолсон юм. Түүнчлэн, ирээдүйд Канадаас устөрөгчийн экспорт авах бололцоог ч судалж байгаа аж.

Ноён Трюдо Канадыг "цэвэр эрчим хүчний найдвартай ханган нийлүүлэгч" гэж онцолсон ч алс хол зайн улмаас тус улсаас Герман руу байгалийн хий шууд тээвэрлэх магадлал бага гэдгийг дурдсан байна.

Хоёр эрхэм мөн автомашины болон уул уурхайн салбарын бизнесийн боломжоос гадна Украинд дэмжлэг үзүүлэх, тэр дундаа дайны дараах сэргээн босголтын талаар хэлэлцэхээр төлөвлөжээ.

Эх сурвалж: AFP

---