Төв болон Өмнөд Европын бүс нутгуудад хүчтэй шуурга дэгдсэний улмаас 12 хүн амиа алдсан бөгөөд тэдний дунд гурван хүүхэд байжээ. Амиа алдсан хүмүүс нь Итали, Австри, Францын Корсика арлын оршин суугчид байжээ.

Өнгөрсөн хэдэн долоо хоногийн турш өргөн хүрээний ган гачигт нэрвэгдээд байсан эдгээр бүс нутаг ийнхүү хүчтэй шуурганд өртсөн байна. Орон нутгийн иргэдийн хэлснээр, хар шуурга гэнэт дэгдсэн бөгөөд албаныхны зүгээс ямар ч урьдчилсан анхааруулга өгөөгүй аж. Корсикад салхины хурд 224 км/цагт хүрсэн бөгөөд энэхүү байгалийн гамшигт үзэгдлийн улмаас 20 хүн шархадсаны дөрвийнх нь биеийн байдал хүнд байна. Эрх баригчдын мэдээлснээр, арлын бараг 13 мянган хүнийг нүүлгэн шилжүүлжээ.

Цаг уурын өөрчлөлтөөс болж сүүлийн үед Европ даяар хүчтэй шуурга ихээр дэгдэх болсон билээ. Гэхдээ Италийн өмнөд хэсэгт хэт халуун цаг агаар үргэлжилсээр, Сицилид 40 хэм хүртэл халсан бол Алжир дахь ой хээрийн түймрийн улмаас 38 хүн нас бараад байна.

Эх сурвалж: BBC

---