“Даншиг наадам-Хүрээ цам 2022” шашин соёлын наадам наймдугаар сарын 6, 7-ны өдрүүдэд Хүй долоон худагт зохион байгуулагдах гэж байна.

Нийслэлийн Засаг даргын хэвлэлийн төлөөлөгч Н.Сугар:

-“Даншиг наадам-Хүрээ цам 2022” шашин соёлын наадам нь аялал жуулчлалын нэг төрлийн бүтээгдэхүүн болох юм. 

Иргэдийн зүгээс эдийн засгийн нөхцөл байдал хүнд байгаа цаг үед баяр наадам хийсний хэрэггүй гэх хандлага, шүүмжлэл ирж байгаа. Үүнтэй холбогдуулан ач холбогдлын талаар аялал жуулчлалын таван компаниас тодруулахад тус наадмыг үзэхээр 150 жуулчин захиалга өгснийг хэлсэн. Ингэхдээ нэг жуулчин дунджаар 2500 долларыг Монголд зарцуулдаг байна. Тиймээс аялал жуулчлалын байгууллагуудад тус наадам чухал ач холбогдолтой гэв. 

Нийслэлийн Аялал жуулчлалын газрын хэлтсийн дарга В.Батчимэг: 

-Монголын Аялал Жуулчлалын Холбооны 5-6 компанийн захиалга баталгаажиж, энэ наадмыг үзэхээр 150 жуулчин ирэхээр болсон. Хувиараа үүргэвчтэй аялагчид бас Гандантэгчинлэн хийдийн урилгаар гаднын улсаас зочид ирнэ. Тиймээс даншиг наадмыг товлосон хугацаандаа буюу наймдугаар сарын 6, 7-ны өдрүүдэд Хүй долоон худагт зохион байгуулна.

Эхний өдөр буюу наймдугаар сарын 6-нд цам харайх ёслол болно. Мөн 256 бөх барилдана, хязаалан, соёолон, жороо морьдын уралдаан болно. Түүнчлэн залуу лам нар ном хаялцаж, мэтгэлцэнэ гэлээ. 

---