Увс аймгийн зарим сумдад малын гоц халдварт өвчин тархсантай холбогдуулан тус аймагт нийтийн хамарсан арга хэмжээ, багийн өдөрлөг, бэсрэг наадам зохион байгуулахыг хоригложээ.

Тодруулбал, мал амьтны гоц халдварт шүлхий өвчний тархалт Ховд аймгийн Мянгад, Баян-Өлгий аймгийн Баяннуур, Увс аймгийн Ховд, Өмнөговь сумдад нэмэгдэж байгаа нь халдвар тархах эрсдэл үүсгэж байгаа тул наймдугаар сарын 1-нээс эхлэн Ховд, Өмнөговь сумдад, наймдугаар сарын 5-наас эхлэн бусад сумдад нийтийг хамарсан арга хэмжээ, багийн өдөрлөг, бэсрэг наадам зохион байгуулахыг тодорхойгүй хугацаагаар хориглосон тушаал гарчээ.

Мөн Увс аймгийн Засаг даргын "Мал эмнэлгийн нэгдсэн арга хэмжээ зохион байгуулах” тухай А/213 дугаар захирамжийн хэрэгжилтийг эрчимжүүлэх, өвөлжилтийн бэлгэл ажлыг хангах зорилгоор аймгийн хэмжээнд мал, амьтны гоц халдварт, халдварт, шимэгчтэх өвчнөөс урьдчилан сэргийлэх арга хэмжээ, халдваргүйтгэлийн ажлыг энэ сарын 1-нээс есдүгээр сарын 10-ны хооронд зохион байгуулахаар болжээ. 

Уг арга хэмжээний хүрээнд нийт үхэр, бог малыг угаалга, туулгалт, боловсруулалтад бүрэн хамруулах, малын хашаа, хороо, өвөлжөө, хаваржааны буйр бууцыг халдваргүйтгэх ажлыг чанартай зохион байгуулж ажиллахыг сумдын Засаг дарга нарт үүрэг болгосон байна. 

 

---