Баянхонгор аймгийн Засаг дарга асан Г.Батжаргал, ИТХ-ын дарга Ц.Отгонбаяр нарыг “Эко грийн ланд” ХХК-ийн удирдлагаас их хэмжээний мөнгө хахуульд авсан, “Түйн гол”, “Хаш гоёо” зэрэг компаниудад хууль зөрчин ашигт малтмал олборлох зөвшөөрөл олгосон асуудлаар 2019 оноос шалгагдаж эхэлсэн. Тэгвэл эдгээр авлигын хэргийг АТГ-аас прокурорт шилжүүлжээ.

Тодруулбал, Баянхонгор аймгийн Засаг дарга асан Г.Батжаргал, ИТХ-ын дарга Ц.Отгонбаяр, Хөрөнгө оруулалт, хөгжлийн бодлого төлөвлөлтийн хэлтсийн дарга “И” нар нь бүлэглэн хахууль өгөгчийн ашиг сонирхлын үүднээс албаны чиг үүргийн хувьд гүйцэтгэх ёсгүй үйлдлийг гүйцэтгэсэн. Улмаар Баянхонгор аймгийн Баян-Өндөр сумын Идрэн дөрөвдүгээр багийн иргэдийн нийтийн хурлаас болон аймгийн Засаг даргын захирамжийн дагуу байгуулсан ажлын хэсгээс дэмжигдээгүй “Хөшөөт” гэх газарт нөхөн сэргээлт хийлгэх, орон нутагт олгох хандив өгүүлэхгүйгээр иргэн “Э”-аас 100,000,000 төгрөгийг хахуульд авсан гэх хэрэт холбогджээ.

АТГ-ын Мөрдөн шалгах хэлтэс эрүүгийн 648 хэрэгт мөрдөн байцаалтын ажиллагаа явуулснаас өнгөрсөн долоо хоногт 7 хэргийг шүүхэд шилжүүлэх, 8 хэргийг хаах, 1 хэргийг харьяаллын дагуу шилжүүлэх саналтай прокурорт хүргүүлжээ. Мөрдөн шалгах ажиллагаанд одоогоор 632 хэрэг шалгагдаж байна.

---