Монгол улсын Ерөнхийлөгчийн Тамгын газрын дарга Я.Содбаатар махны асуудлаар мэдээлэл хийлээ. Монгол улс хүнсний аюулгүй байдлын үзүүлэлтүүдээ шинэчилж, хэрэглэгчдийн гар дээр очиж буй бүтээгдэхүүний чанар, аюулгүй байдлыг хангах олон ажил хийгдэнэ гэдгийг онцоллоо. 

ЕТГ-ын дарга Я.Содбаатар: 

- Хүнсний аюулгүй байдлын асуудлаар Монгол Улсын Ерөнхийлөгчийн байр суурь тодорхой байгаа. Бид хүнсний хангамж аюулгүй байдалдаа онцгой анхаарах цаг үе ирсэн. Олон улсын ээдрээт нөхцөл байдал, улс орнууд хооронд гарч байгаа мөргөлдөөнүүд дэлхий нийтийн хүнсний хангамжид маш ноцтойгоор нөлөөлж эхэлж байна. ОХУ, Украин улсууд дэлхий хүнсний нийлүүлэгч орнууд. Энэ орнуудад үүссэн нөхцөл байдлаас улбаалаад манай хил залгаа орнууд хүнсний экспортдоо хязгаарлалтууд хийж байна. Энэ нь манай хүнсний хангамжид сөргөөр нөлөөлөх нөхцөл байдал үүсэж байна.

Манайд сүүлийн нэг жилийн хугацаанд хүнсний бүтээгдэхүүний үнэ өссөн. Бид хүнсний хангамжаа ихэнхийг нь импортоор авч байгаа учраас цаг үеийн нөхцөл байдлаас болон Covid-19 цар тахлаас шалтгаалсан хүндрэлүүд эргээд хүнсний хангамжид, цаашилбал хүнсний аюулгүй байдалд сөргөөр нөлөөлж байна гэж хэлж болно.

Хүнсний аюулгүй байдлын асуудлыг энэ хүрээнд их хурцаар тавьж байгаа. Тавдугаар сарын 13-нд Монгол Улсын Ерөнхийлөгч парламент дээр үг хэлж, Хүнсний аюулгүй байдлын талаар авах зарим арга хэмжээний тухай төслийг өргөн барьсан. УИХ яаралтай горимоор хэлэлцэн баталж, хүнсний хангамж, хөдөө аж ахуйн салбарт түүхэн шийдвэр гаргасан. Энэ тогтоол долоодугаар сарын нэгнээс хэрэгжээд эхэлнэ. Тогтоол хэрэгжсэнээр таван жилийн хугацаанд Монгол Улсад 19 нэр төрлийн бүтээгдэхүүнээр дотоодын хэрэгцээгээ хангах бөгөөд бүх малаа эрүүлжүүлэх зорилт тавьсан.

Энэ дотор нэг томоохон асуудал бол лабораторийн хүчин чадлыг сайжруулах, үндэсний лабораторийн нэгдсэн сүлжээ бий болгох, үүнийгээ дагаад үндэсний лавлагааны лабораториос эхлүүлээд бусад төр, хувийн хэвшлийн итгэмжлэгдсэн лабораториудыг олноор байгуулж, хяналтыг сайжруулах зайлшгүй шаардлага бий болж байгаа юм.Таван жилийн хугацаанд нийт малаа эрүүлжүүлэх цогц арга хэмжээг авч ажиллана. Эхний ээлжинд дотооддоо вакцин үйлдвэрлэдэг болох шаардлагатай байна. 

Иргэдийг ихээхэн бухимдуулсан Эмээлтийн махны асуудал байна. Энэ бол хүнсний аюулгүй байдал алдагдаж буйн томоохон жишээ. Монгол Улсын Ерөнхийлөгч энэ асуудлыг анхааралдаа авч, холбогдох албан тушаалтнуудад хатуу сануулга өгч, мэргэжлийн хяналт, стандартчилал хэмжил зүйн болон холбогдох олон хүнд хариуцлага тооцохыг чиглэл болгосон. Эмээлтийн махны асуудалд мөрдөн шалгах ажиллагаа үргэлжилж байна.

Монгол улсын ерөнхийлөгч сүүлийн хоёр сар гаруйн хугацаанд хүнсний аюулгүй байдлын асуудлаар хэд хэдэн томоохон зөвлөгөөн зохион байгуулж байгаа нь өөрөө улс төрийн манлайлал үзүүлж байгаа хэрэг. Хүнсний аюулгүй байдал гэдэг зүйл нь үндэсний аюулгүй байдалтай холбоотой асуудал. Тэр ч утгаараа Монгол улсын ерөнхийлөгч тус асуудалд онцгой анхаарах нь зүй ёсны асуудал юм.

Ерөнхийлөгч У.Хүрэлсүхийн дүүг махны асуудлаар хууль хяналтын байгууллага шалгаж байгаа гэсэн мэдээлэл түгсэн. Ийм асуудал огт байхгүй гэдгийг хариуцлагатайгаар мэдэгдмээр байна гэлээ.  

---