Өнгөрсөн өдрийн түр зуурын хүчтэй салхи, аадар борооны улмаас нийслэлийн нутаг дэвсгэрт айлын хашаа байшин, гэр, орон сууцны зоорийн давхар усанд автсан, нурсан, байшингийн дээвэр хууларч унасан зэрэг 89 дуудлага НОБГ- т иржээ.

Тодруулбал Баянзүрх дүүрэгт 11, Сүхбаатар дүүрэгт хоёр, Сонгинохайрхан дүүрэгт 53, Чингэлтэй дүүрэгт найман, Хан-Уул дүүрэгт 11 дуудлага бүртгэгдсэн байна. 

Дуудлагын дагуу Нийслэлийн Онцгой байдлын газрын алба хаагчид очиж найман гэр, долоон байшин усанд автаж, хоёр гэр нурж, таван байшингийн дээвэр хууларсныг аюулгүй болгож, үерийн усыг соруулж, зам гарцыг цэвэрлэж, заавар зөвлөгөө өгч ажиллажээ.

Дүүргийн Онцгой байдлын хэлтэс, Гал түймэр унтраах, аврах ангиудын бүрэлдэхүүн 27 байршилд очиж, аюулгүй байдлыг хангасан байна.

Үер усны аюулаас сэрэмжтэй байхыг Нийслэлийн Онцгой байдлын газраас анхааруулж байна.

---