Нийслэлийн засаг дарга Д.Сумъяабазар тэргүүтэй албаныхан Дугуй цагаан орчмын чөлөөлсөн талбайд хийх бүтээн байгуулалтын  талаар зөвлөлдлөө.

Нийслэлийн Засаг даргын А/740 тоот захирамж гарч, Дархан цаазат Богдхан уулын тэнцвэрт байдал, ой, ургамалд сөрөг нөлөөтэй байгууламжуудыг буулгаж эхэлсэн. Тухайлбал, Хан-Уул дүүргийн 11 дүгээр хорооны нутаг Ар Зайсангийн гудамжинд байрлах хийц бүтээцэд нь ан цав, цууралт үүсэж, ноцтой эвдэрч гэмтсэн барилга байгууламжуудыг албадан буулгах ажлыг эхлүүлсэн. Тэгвэл өнөөдөр Нийслэлийн засаг дарга Д.Сумъяабазар тэргүүтэй албаныхан тус газрын нөхцөл байдал, цаашид хийх бүтээн байгуулалтын талаар ярилцлаа.

Нийслэлийн засаг дарга бөгөөд Улаанбаатар хотын захирагч Д.Сумъяабазар:

- Богдхан уулын орчны тохижилттой холбоотой саналуудыг иргэд ихээр ирүүлсэн. Хувийн хэвшилтэйгээ ойлголцохгүй байх асуудал гарсан. Хуулийн дагуу явах ёстой гэдэгтэй санал нэг. Тухайн үед хувийн хэвшилтэйгээ нийлээд иргэдийн ая тухтай амарч тухлах нөхцөл бүхий ногоон байгууламж бүтээн байгуулалтад ажиллахаар ярьж байсан. Цар тахлын нөхцөл байдал байснаас хүндрэл гарсан. Хувийн өмч тал дээр гомдол саналтай байгаа хүмүүс бий. Түүнийг ойлгож байгаа. Гэхдээ хуулийн хүрээнд тухайн ажиллагааг явуулсан. Ард иргэдийн 90 орчим хувь нь энэ орчны тохижилтыг шаардаж байна. Тэгэхээр Хотын дарга ард иргэдийнхээ талд байна. Эл асуудал дээр талцаад байх шаардлагагүй. Л.Мөнхбат даргыг уулзаж ярилцсан.Хоёрдугаарт, Богд уулын газарт Хотын дарга Д.Сумъяабазар хаус хороолол барих гэж байна гээд байх юм. Тийм зүйл огт байхгүй. Надад сөөм газар авах ч сонирхол алга. Харин Улаанбаатарчууд ая тухтай амарч зугаалах нөхцлийг бүрдүүлэхийн төлөө ажиллана гэлээ. 

"Энигма" компани, МҮИС-ийн ТУЗ-ийн дарга Л.Мөнхбат:

-Богд хаан" жуулчны бааз өмч хөрөнгөө эвдүүлсэндээ харамсаж байна. Бидний зогсож буй энэ ам Даяанчийн ам гэдэг нэртэй, эртнээс авшигтай газар. Оюун санаагаа төвлөрүүлэх гэж энд ирдэг байжээ.Бид энд эрдэм шинжилгээ, судалгааны аялал жуулчлал хөгжүүлэхээр ажилласан ч зөвшөөрөл өгдөггүй.  Бид энэ газрыг 2017 онд авсан. Энэ газрыг биднээс авахын тулд намайг Бээжинд хар тамхи татсан хэргээр баригдлаа гэх мэтээр гүтгэж байсанд би их харамсдаг. Би 18 наснаасаа Орос, Хятад, Солонгост бизнес хийсэн.  Хүний нутагт зодуулсан, дээрэмдүүлсэн, буу тулгуулсан удаа ч бий.   

Манай компанийн ард ямар ч улс төрч байхгүй. Бидний хийж бүтээж буй бүхэн Монголын өмч болно, би үхлээ гэхэд өөр хүнд үлдэнэ. Өнөөдөр МҮИС-ийн ард ямар нэгэн улс төрч байхгүй. 

Өнөөдөр хотын дарга дуудсанд баярлаж байна. Бид шүүхэд нэхэмжлэлээ гаргасан. Шүүхийн шийдвэр гараагүй тул энэ талаар хамаагүй ярьж болохгүй байна. Хохирлын хэмжээг хөндлөнгийн аудит тогтооно. Манай таван  ажилтны амьдарч байсан байрыг нураасан. Тэд хувцсаа ч авч чадаагүй тул бид хохирлыг нь барагдуулна. 

Богд уулын тус амыг тохижуулах ажил удахгүй эхлэх юм байна. Тоглоомын болон чийрэгжүүлэлтийн талбай, хоёр гүүр, хоолны цэгүүд, нийтийн бие засах газар, алхалтын жим, задгай театр, таван амрах өртөө байгуулахаар төлөвлөжээ. Ингэхдээ байгалийн тогтцыг алдагдуулахгүй, дандаа модон материал ашиглана гэв.     

---