Засгийн газраас нийгмийн даатгалын шимтгэлийн 50 хувийг он дуустал буцаан олгохоор шийдвэр гаргасан. Уг шийдвэртэй холбоотойгоор ХНХ-ын сайд А.Ариунзаяа Засгийн газрын хуралдааны шийдвэрийг танилцуулах үеэрээ дараах тайлбарыг өглөө.

ХНХ-ын сайд А.Ариунзаяа:

-Нийгмийн даатгалын шимтгэл төлөгч өөрөө төлсөн хэсгийн 50 хувийн буцаалтыг нэг сая төгрөгөөс доош орлоготой иргэдэд буцаан олгох шийдвэрийг УИХ-аас гаргасан. Энэ шийдвэр тавдугаар сарын 1-нээс хэрэгжиж эхэлсэн байгаа. Улмаар дараа сарын 25-наас НДШ-ийн буцаалт хийгдэнэ гэсэн журам хэрэгжиж эхэлсэн.

Тэгэхээр тавдугаар сард иргэн өөрөө төлсөн НДШ-ийн буцаалт зургаадугаар сарын 25-ны өдөр болон түүнээс хойш хугацаанд иргэдийн дансанд орох болно. Урьдчилсан байдлаар 400 мянга орчим иргэн нэг сая төгрөгөөс доош цалин авдаг тооцоо гарсан. Эдгээрээс 80 мянган иргэн сайн дурын шимтгэл төлөгч бусад нь ААН байгууллагаар албан журмын даатгал төлдөг байна.

Тэгэхээр иргэдийн дансны мэдээллийг авах том ажил хийгдэх учраас магадгүй эхний сардаа алдаа дутагдалтай зүйлс гарахыг үгүйсгэхгүй. Аль болох хүндрэл учруулахгүйгээр иргэдийн дансны мэдээллийг цуглуулж, бэлтгэл ажлаа хийгээд явж байна гэлээ.

Буцаан олголтод уул уурхай, газрын тосны салбарт ажилладаг болон нэг сая төгрөгөөс дээш цалинтай иргэд хамрагдахгүй юм.

---