УИХ-ын Төрийн байгуулалтын байнгын хорооны хуралдаан үргэлжилж байна. Байнгын хорооны хурлаар АН-ын бүлгийн дарга Д.Ганбатыг өөрчлөх агуулга бүхий хуулийн төслийг хэлэлцлээ.

Тодруулбал, УИХ-ын гишүүн О.Цогтгэрэл нарын 9 гишүүний өргөн барьсан Монгол Улсын Их Хурлын тухай хуульд нэмэлт өөрчлөлт оруулах тухай хуулийн төслийг байнгын хорооны хурлаар хэлэлцсэн юм.

Хэлэлцэж буй хуулийн төсөлтэй холбоотойгоор УИХ-ын гишүүн, АН-ын бүлгийн дарга Д.Ганбат “Ганц хүнд зориулсан хууль гэж харж байна. Энэ асуудлаар АН-ын бүлэг тав хоног завсарлага авах горимын санал гаргаж байна” гэсэн юм.

Харин АН-ын бүлгийн бусад гишүүд Д.Ганбатын гаргасан горимын саналыг дэмжсэнгүй. Төрийн байгуулалтын байнгын хорооны хуралдаан даргалагч Н.Энхболд уг асуудлаар бүлэг дотроо асуудлаа хэлэлцээд орж ирэхийг сануулж, ажлын хоёр хоногийн завсарлага өглөө.

Тус хуулийн төсөл батлагдсан тохиолдолд бүлгийн гишүүдийн олонх нь бүлгийн даргаа томилдог, чөлөөлдөг, огцруулдаг хуулийн боломж нээгдэх юм.

---