Говь-Алтай аймгийн засаг дарга О.Амгаланбаатар цахим сүлжээгээр цацагдаад буй мэдээлэлтэй холбогдуулан өөрийгөө Авлигатай тэмцэх газарт шалгуулахаар болжээ.

Говь-Алтай аймгийн засаг дарга О.Амгаланбаатар:

- Сүүлийн зургаан сарын хугацаанд нэр бүхий улс төрчдийн захиалгаар, зохион байгуулалттайгаар намайг харлуулах ажил эрчимжлээ. Иймд Говь-Алтай аймгийн засаг даргаар хоёр удаа ажиллаж байх хугацаандаа гаргасан тушаал, шийдвэр, зарцуулсан зарлагаа шалгуулахаар өөрт хамааралтай бүх материалыг АТГ-т өгч байна. Монгол Улсад жишиг болж өөрийгөө шалгуулахаар ирлээ. Бусад хүмүүс бас ингэж шалгуулж үнэн байгаасай.

Намайг согтуугаар тээврийн хэрэгсэл жолоодож яваад осол хийсэн гэх хуурамч мэдээлэл гарсан. Мөн өмч хөрөнгөтэй холбоотой зүйлс аймгийн засаг даргад хамааралгүй бөгөөд тамгын газрын нэр дээр байсан Land 200 маркийн автомашиныг 1 сая төгрөгөөр хувьчилсан гэх мэдээллийг мөн шалгуулахыг хүсэж байна. Өмч, хөрөнгөтэй холбоотой шийдвэрийг аймгийн ИТХ гаргадаг. Үнэн, ил байх ёстой гэж бодсон учраас ийм шийдвэр гаргаж өөрийгөө шалгуулах хүсэлт өгч байна. Намайг архидан согтуурсан гэсэн мэдээлэл байна. Би архи уугаагүй олон жил болж байгаа. Говь-Алтай аймагт болж байгаа сөрөг бүх зүйлийг надтай холбогдож байна. Манай аймаг шинэ соргог зүйлсийг сүүлийн жилүүдэд хийгээд явж байгаа ч харлуулах гэсэн нэр бүхий улс төрчдийн захиалга их байна. Гэхдээ би энэ хүмүүсийн нэрсийг одоо зарлахгүй гэв.

---