Авлигатай тэмцэх газрын Мөрдөн шалгах хэлтэс  5 дугаар сарын 30-наас 6 дугаар сарын 3-ны өдрүүдэд гэмт хэргийн шинжтэй 20 гомдол, мэдээлэл хүлээн авч, нийт 99 гомдол, мэдээллийг шалгав.

Үүнээс 11 гомдол, мэдээлэлд хэрэг бүртгэлтийн хэрэг нээж, 13 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 75 гомдол, мэдээллийг хянан шалгаж байна.

Түүнчлэн эрүүгийн 643 хэрэгт мөрдөн байцаалтын ажиллагаа явуулснаас 9 хэргийг шүүхэд шилжүүлэх, 7 хэргийг хаах, 1 хэргийн харьяаллын дагуу шилжүүлэх саналтай прокурорт хүргүүлж, 3 хэргийг нэгтгэн шалгаж байна. Мөрдөн шалгах ажиллагаанд одоогоор 623 хэрэг шалгагдаж байна.

Хэргийг шүүхэд шилжүүлэх саналтайгаар прокурорын байгууллагад хүргүүлсэн хэргүүдээс дурдвал:

- Баян-Өлгий аймгийн 14 дүгээр цэцэрлэгийн эрхлэгчээр ажиллаж байсан “Д” нь албан үүрэг, бүрэн эрх, албан тушаалын байдлаа урвуулан ашиглаж өөрийн хамаарал бүхий хүнд болон бусдад давуу байдал бий болгосон гэх;
- Архангай аймгийн Батцэнгэл сумын Дэл багийн Засаг дарга “Т” нь албан тушаалтны байдлаа урвуулан ашиглаж төсвийн хөрөнгийг хувьдаа завшсан гэх;
- Баян-Өлгий аймгийн Баяннуур сумын хүүхдийн цэцэрлэгийн эрхлэгчээр ажиллаж байсан “А” өөртөө болон бусдад давуу байдал үүсгэсэн гэх;
- Говь-Алтай аймаг дахь Цагдаагийн газрын ажилтан “Л” нь Зөрчил шалган шийдвэрлэх ажиллагаа явуулахдаа нотлох баримт хуурамчаар үйлдсэн гэх;
- ШУТИС-ийн Хэрэглээний шинжлэх ухааны сургуулийн Физикийн тэнхимийн ахлах багш "Э" нь 2020 оны 05 дугаар сард хууль бусаар сурлагын дүн засаж оюутнуудаас хахууль авсан гэх;
- Баян-Өлгий аймгийн Цэнгэл сумын Эрүүл мэндийн төвийн дарга "Ө" нь эрх мэдэл, албан тушаалын байдлаа урвуулан ашиглаж хийх ёсгүй үйлдэл хийж бусдад давуу байдал бий болгосон гэх;
- Архангай аймгийн Цэцэрлэг сумын Засаг дарга "М" нь эрх мэдэл, албан тушаалын байдлаа урвуулан ашигласан гэх;
- "Ирээдүйн эмч" сургалтын төвийн багш "Б" нь АШУҮИС-д хүүхэд элсүүлэхэд 6-8 сая төгрөгийн хандив нэхсэн гэх;
- Говь-Алтай аймгийн Биеийн тамир спортын газрын дарга "Б" нь албан тушаалаа урвуулан ашиглаж тус газрын засварын ажлын гүйцэтгэгчээр нэр бүхий компанийг сонгон шалгаруулахын тулд тус аймгийн Хөрөнгө оруулалт хөгжлийн бодлого төлөвлөлтийн хэлтсийн мэргэжилтэн "Б"-тэй бүлэглэн бусдад давуу байдал бий болгосон гэх

---