Пауэрлифтингийн ДАШТ-ээс медаль хүртсэн баг тамирчид болон дэлхийн дээд амжилт тогтоосон Хөдөлмөрийн баатар, гавьяат тамирчин Э.Содномпилжээ, ОУХМ Б.Чимэдцэрэн, тэдний багш, дасгалжуулагч нар мэдээлэл хийлээ.

Монголын Пауэрлифтингийн холбооны ЕНБД, гавьяат дасгалжуулагч Д.Баттулга:

-Пауэрлифтингийн хэвтээ шахалтын ДАШТ-д манай улсын баг тамирчид амжилттай яваад ирлээ. Тус тэмцээнд манай улсаас 38 тамирчин явсан. Арван алт, найман мөнгө, таван хүрэл медальтай, багийн зургаан цом хүртлээ.

Хөдөлмөрийн баатар, гавьяат тамирчин Э.Содномпилжээ -120кг оролцож, дэлхийн рекордыг найман кг ахиулан шинэчлэн тогтоолоо. ОУХМ З.Баярхүү -120кг жинд оролцож хүрэл медаль хүртсэн. Өмнөговь аймгийн Энержи Ресурс ХХК-ийн тамирчин Г.Оргилболд өмнө нь ДАШТ-нд хоёр удаа тавдугаар байранд орж байсан бол энэ жил 227кг өрсөлдөж, дэлхийн аварга боллоо. Түүний жинд дэлхийн алдартай бүх тамирчид оролцсон байгаа. 

Хөдөлмөрийн баатар, гавьяат тамирчин Э.Содномпилжээ:

-Энэ жил анх удаа төрөлдөө -120кг жинд өрсөлдлөө. Өмнө -105кг жинд өрсөлддөг байсан. Дэлхийн рекордыг 8кг эвдээд амжилт тогтоосондоо баяртай байна. Зургадугаар сарын 12-нд парапоуэрлифтингийн азийн аварга шалгаруулах тэмцээнд оролцох байгаа. Энэ нь 2024 оны Парисын паралимпын наадмын эрх авах тэмцээний нэг. Дэлхийн зэрэглэлийн ес дэх рекордоо эвдлээ гэв.

---