ОХУ Украин дахь дайнд тактикийн цөмийн зэвсэг хэрэглэхгүй гэж ОХУ-аас Их Британид суугаа Элчин сайд Андрей Келин "ВВС" агентлагт хэлжээ.

Түүний тэмдэглэснээр, Оросын цэргийн дүрэм журмын дагуу ийм төрлийн мөргөлдөөнд цөмийн зэвсэг ашиглахыг хориглодог аж. Тактикийн цөмийн зэвсэг нь харьцангуй богино зайд харвах боломжтой зэвсгийг хэлдэг бол "стратегийн" цөмийн зэвсэг нь илүү хол зайг хамардаг бөгөөд бүх нийтийг хамарсан цөмийн дайныг өдөөх аюултай юм. Орос улсыг 2,000 орчим тактикийн цөмийн зэвсэгтэй гэж олон улсын мэргэжилтнүүд үздэг. 

Оросын арми Украинд түрэмгийлж эхэлсний дараахан буюу энэ оны 2 дугаар сарын сүүлчээр Ерөнхийлөгч Владимир Путин цөмийн зэвсгээ өндөржүүлсэн бэлэн байдалд оруулсан бөгөөд шинжээчид үүнийг анхааруулга гэж дүгнэсэн. Барууны орнууд болон НАТО-гийн түрэмгийллийн улмаас ийм алхам хийснээ Владимир Путин онцлоод байсан билээ.

Тэгвэл Ерөнхийлөгч Путин Украинаас цэргээ бүрэн гаргаснаар дайн дуусна гэж мэдэгдсэн Их Британийн Гадаад хэргийн сайд Лиз Трассын талаар Элчин сайд Андрей Келин "Хатагтай Трасс маш түрэмгий нэгэн. Мөн тэрээр мэргэжлийн цэргийн хүн биш бөгөөд Гадаад хэргийн сайдын хувьд ч туршлагагүй" хэмээн шүүмжилжээ. Ноён Келин түүнчлэн Оросын зэвсэгт хүчин энгийн иргэдийг хөнөөж байгааг үгүйсгэн, Буча хотод дайны гэмт хэрэг үйлдсэн гэх мэдээлэл нь "зохиомол зүйл" гэж мэдэгдсэн байна.

Эх сурвалж: BBC

---