Чингэлэг тээвэртэй холбоотойгоор БНХАУ-д Эрээн боомтын албан тушаалтнуудыг саатуулж, шалгаж байгаа гэх мэдээлэл гарч эхэлсэн. Тус асуудалд манай талаас Л.Халтар сайд холбогдсон гэх зүйл яригдаж байгаа юм. Үүнтэй холбоотойгоор Зам, тээврийн хөгжлийн сайд Л.Халтар сэтгүүлчдийн асуултад дараах байр суурийг илэрхийллээ.

-Чингэлэг тээвэртэй холбоотойгоор БНХАУ-ын албан тушаалтнуудыг саатуулж, шалгаж байгаа гэх мэдээлэл гарч байна. Энэ асуудалд манай талаас Л.Халтар сайд таныг холбогдсон гэдэг зүйл яригдаж байна?

-Эрээн дээр байгаа хил гаалийн улсуудыг шалгаж байгаа гэдгийг цахим орчноос мэдээлэл авснаар мэдсэн. Албан ёсоор авсан мэдээлэл алга. Надад идсэн, уусан зүйл байхгүй учраас би хэзээ ч хаана ч шалгуулахад нүүр бардам байна.

-Таны хамаарал бүхий хүн тээвэр зуучийн компанитай гэдэг?

-Тийм, тэгж ярьдаг. Тэрийгээ батлах баталгаа гаргаад ир. Хөрөнгө орлогын мэдүүлэг дээр тийм зүйл байхгүй.

-Ачаа тээврийн үнэ хоёр дахин өсөж, маш том авлигын сүлжээ байна гэдгийг БНХАУ-ын тал илрүүллээ. Энэ асуудал Монгол улсын тал хамааралтай гэдэг хардлага байна?

-Нийгэмд тийм хардлага байгааг хэн ч үгүйсгээгүй. Гэхдээ шалгадаг хүн нь би биш. Энэ асуудлыг бид өмнө нь Тагнуулын байгууллагад шалгах хүсэлт өгч байсан. Цар тахлын үед бидэнд хилээ нээх л нэн тэргүүний ажил байсан. БНХАУ-ын талаас тавьсан бүх шаардлагыг Гадаад харилцааны яамаар дамжуулж бид хүлээн зөвшөөрсөн. Гэхдээ үүний цаана Хятадад ямар авлигын сүлжээ үүссэн байсныг харамсалтай нь надад мэдэх юм алга гэлээ.

---