ОХУ-ын эдийн засаг "шинэ нөхцөл байдлын хүрээнд" нээлтэй хэвээр байна гэж Ерөнхийлөгч Владимир Путин өнгөрөгч мягмар гарагт хийсэн цахим уулзалтынхаа үеэр хэлжээ.

Түүнчлэн, харилцан ашигтай түншлэлийн холбоо тогтоох сонирхолтой улс орнуудтай хамтын ажиллагаагаа өргөжүүлэхийг ноён Путин онцолсон юм. Тэрээр Оросын эдийн засгийн байдлын талаар "Үндэсний мөнгөн тэмдэгтээр төлбөр хийхэд тохиромжтой дэд бүтцийг бий болгож, шинжлэх ухаан, технологийн хэлхээ холбоог тогтоон, логистикийн сүлжээний хүчин чадлыг нэмэгдүүлж, ачаа тээвэрлэх шинэ чиглэлийг үүсгэх нь чухал" хэмээн тэмдэглэжээ.

Зарим улс орон "ОХУ-аас өөрсдийгөө тусгаарлах" хүсэлтэй байгаа тул эдгээр ажлын стратегийн ач холбогдол сүүлийн саруудад эрс нэмэгдэж, тээврийн урсгалыг төрөлжүүлэх шаардлагатай болсныг дурдсан Владимир Путин үргэлжлүүлэн "Оросыг хаах биш, харин ашиггүй байдалд орсон ч Оросоос өөрсдийгөө тусгаарлахаар эрмэлзэж буй зарим улс орны үйл ажиллагаа нь тээврийн урсгалыг нэн даруй төрөлжүүлэх хэрэгтэйг харуулж байна. Бид урьдчилан таамаглах боломжтой, хариуцлагатай түншүүдтэй хамтран ажиллах ёстой" гэсэн байна.

Эх сурвалж: ТАСС

---