НҮБ-ын дэргэдэх ОХУ-ын төлөөлөгчийн газрын дипломатч Борис Бондарев "Путины Украинд эхлүүлсэн цуст, ухаангүй дайныг" эсэргүүцэн, албан тушаалаасаа огцорчээ.

Ноён Бондаревын энэхүү шийдвэрийн дараа Кремль түүнийг урвагч гэж үзэх магадлалтай ч тэрээр дайны эсрэг бат зогсож буйгаа "BBC" агентлагт хэлсэн байна. Өөрийн олон нийтийн сүлжээндээ нийтэлж, бусад төлөөлөгчтэй хуваалцсан захидалдаа тэрээр дипломатын албанд зүтгэсэн 20 жилийн карьераа дуусгахаар шийдсэнээ мэдэгдэн, дайныг "Украин болон Оросын ард түмний эсрэг гэмт хэрэг" гэж тодорхойлсон юм.

Борис Бондарев үргэлжлүүлэн "Би хэзээ ч эх орныхоо өмнөөс ингэж ичиж байсангүй. Энэ дайныг санаачилсан хүмүүс зөвхөн нэг л зүйлийг хүсэж байгаа нь засгийн эрхэнд үүрд үлдэх явдал. Үүнд хүрэхийн тулд тэд олон хүний ​​амь насыг золиослоход бэлэн байгаа бөгөөд улмаар мянга мянган орос, украйн иргэн аль хэдийн амиа алдаад байна" хэмээн бичжээ.

Тэрээр мөн Оросын Гадаад хэргийн яамыг дипломат үйл ажиллагаанаас илүү "худал хуурмаг, үзэн ядалт"-д анхаарч байгаа гэж буруушаан, Ерөнхийлөгч Владимир Путин, Гадаад хэргийн сайд Сергей Лавров болон Оросын бусад дипломатчийг шүүмжилсэн байна.

Москвагийн зүгээс энэ талаар хараахан тайлбар хийгээгүй ч Оросын эрх баригчид "цэргийн тусгай ажиллагаа"-ны талаар шүүмжлэлтэй хандаж, эсвэл үгүйсгэсэн иргэдийг хатуу чанга шийтгэж байгаа билээ. Гэвч ОХУ-ын цэргийн хүчний Украин дахь түрэмгийлэл эхэлснээс хойших гурван сарын хугацаанд Оросын төрийн байгууллагуудаас нээлттэй эсэргүүцэл илэрхийлсэн явдал цөөнгүй гараад байна.

Эх сурвалж: BBC

---