Хондурасын хар тамхины наймааны хамгийн том бүлэглэлүүдийн нэгийг удирдаж байсан 61 настай эмэгтэйг баривчилсан талаар тус улсын цагдаа нар мэдээлжээ.

Херлинда Бобадилла нь Монтес овгийн гэмт хэргийн бүлгийг дөрвөн хүүгийн хамт удирдаж байсан бөгөөд Колумби болон кокайн үйлдвэрлэгч бусад орноос шумбагч онгоц, хууль бус нисэх онгоц, завь зэргээр их хэмжээний кокайн тээвэрлэн оруулж ирдэг байжээ. Дараа нь тэд хар тамхиа Хойд Америк, Мексикээр дамжуулан АНУ руу зөөвөрлөдөг байсан гэж тус улсын прокурорууд буруутгаж байгаа юм.

Ингээд АНУ-ын Төрийн департамент Херлинда болон түүний хүү Тито, Хуан Карлос Монтес нарыг АНУ-д шилжүүлэн өгөхийг хүсэж, тус бүрийнх нь баривчилгаанд хүргэх мэдээлэлд таван сая ам.долларын шагнал санал болгосон аж. Үүний дараа Хондурасын цагдаа нар иргэдээс их хэмжээний мэдээлэл хүлээж авсан бөгөөд эцэст нь Херлинда Бобадилла болон түүний хөвгүүдийг Колон мужийн уулархаг нутгаас олж илрүүлсэн байна.

Тусгай хүчнийхэн "ноцтой мөргөлдөөн"-ий дараа Херлинда Бобадиллаг баривчилсан бөгөөд 32 настай Тито Монтес "тусгай ажиллагааны алба хаагчид руу гал нээж, улмаар амь үрэгдсэн" гэж цагдаа нар мэдээлсэн юм. Харин 35 настай Хуан Карлос Монтес албаныхнаас зугтаж чаджээ.

Эх сурвалж: BBC

---