Байгаль орчин, аялал жуулчлалын яамны 2021 оны санхүүгийн тайлан, төсвийн
гүйцэтгэлд Үндэсний аудитын газраас аудит хийснээ 2022 оны хоёрдугаар сард тайлагнажээ.

Тайлангаар БОАЖЯ-нд хэд хэдэн зөрчил гарсныг, акт тогтоож, засах үүргийг өгсөн байна.

Тухайлбал, БОАЖЯ-нд он дамжсан 307 сая төгрөгийн авлага үүсээд байгаа аж. Зөвхөн 2021 онд 69 сая 938 мянган төгрөг /тухайн үед БОАЖ-ын сайд Н.Уртнасан удирдаж байсан/-ийн өр үүссэн байна. Өөрөөр хэлбэл, гурван сарын өмнө БОАЖ-ын сайдаар томилогдсон Б.Бат-Эрдэнэ 307 сая төгрөгийн авлага хүлээн авсан ба нарийвчилсан төлөвлөгөө гарган ажиллаж, 2022 оны есдүгээр сарын 30-ны дотор АҮГ-т эргэн танилцуулах үүрэг хүлээжээ.

Цаашилбал, БОАЖЯ-нд улсын төсвийн хөрөнгөөр хэрэгжүүлсэн төсөл, хөтөлбөрийн үр дүнд бий болсон 11 тэрбум 795 сая төгрөгийн өртөгтэй тоног төхөөрөмж, эд хөрөнгийг ашиглагч байгууллагуудад шилжүүлээгүй зөрчил илэрсэн байна.

БОАЖ-ын сайдаар ажиллаж байсан Н.Уртнасан Засгийн газрын 2021 оны 43 дугаар тогтоолыг зөрчиж, спортын арга хэмжээнд 49 сая төгрөг зарцуулсан зөрчил мөн илэрчээ. Засгийн газрын тогтоол ёсоор “Засгийн газрын шийдвэр гарснаас бусад баяр ёслол, тэмдэглэлт ой, урлагийн наадам, спортын уралдаан тэмцээн, салбарын өдөр, аялал зугаалга зэргийг зохион байгуулахгүй байх”-аар заасныг үл тоон ажиллажээ.

Шинээр томилогдсон БОАЖ-ын сайд Б.Бат-Эрдэнэ мөн хэрэгжиж дууссан төсөл, арга хэмжээтэй холбоотой ажлын гэрээг дүгнээгүй 8 тэрбум 403 сая төгрөг, Аялал жуулчлалын хөгжлийн төвд шилжүүлсэн 365 сая төгрөгийн урьдчилгаа санхүүжилтийн үлдэгдлийг өмнөх сайдаасаа хүлээн авсан байна. Эдгээр зөрчлийг дээр заасанчлан 9 сарын 30-ны дотор засаж, эргэн мэдэгдэх үүрэг хүлээсэн байна.

Өөрөөр хэлбэл, БОАЖ-ын сайд Б.Бат-Эрдэнэ нь өмнөх сайд Н.Уртнасангаас 20 тэрбум гаруй төгрөгийн зөрчил хүлээн авсныг аудитын дүгнэлтээс харж болохоор байна. 

---