УИХ-ын чуулганы үдээс хойших хуралдаанаар Хот, суурины ус хангамж, ариутгах татуургын ашиглалтын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг хэлэлцлээ. 

Хуралдааны эхэнд УИХ-ын гишүүн Х.Баделхан Хот, суурины ус хангам, ариутгах татуургын ашиглалтын тухай хуульд нэмэлт, өөрчлөлт оруулах тухай хуулийн төслийг танилцуулсан юм. 

Хот, суурины ус хангамж, ариутгах татуургын ашиглалтын тухай хууль анх 6 бүлэг, 19 зүйл, 128 заалттайгаар 2002 оны 06 дугаар сарын 03-ны өдөр, шинэчилсэн найруулга нь 2011 оны 10 дугаар сарын 06-ны өдөр 7 бүлэг 24 зүйл 188 заалттайгаар батлагдсан. Энэхүү хуулийн хэрэгжилтэд хяналт шинжилгээ, үнэлгээ хийхэд, нийт 188 заалтаас 80 заалт нь хэрэгжиж байгаа, үлдсэн 108 заалтын 40 гаруй хувийн хэрэгжилт хангалтгүй нэмэлт, өөрчлөлт оруулах шаардлагатай гэсэн дүгнэлт гарсан байна.

Хууль санаачлагчийн илтгэл, байнгын хорооны санал, дүгнэлттэй холбогдуулан гишүүд асуулт асууж, хариулт авсан юм. 

УИХ-ын гишүүн Б.Энхбаяр: 

- Хот, суурины усан хангамж, ариутгалын тухай хуулийн төслийн шинэчлэлийг Зөвшөөрлийн тухай хуультай уялдуулах шаардлагатай. Хоёрдугаарт, монополь байдал үүсгэж болж байна уу энд. Яагаад гэхээр үнэ тарифтай холбогдоно. Үүнд ялгамжтай байх ёстой. 

Цаашдын чиг хандлага дэлхий дээр ус хамгийн үнэтэй зүйл болж хувирна. Үүнийг манай говийнхон сайн мэднэ. Хот суурин газрынхан усны үнэ цэнийг хэр мэдэх бол оо. Үнэгүй юм бол үнэгүй байдаг. Тэгэхээр хэрэглээндээ гамтай байх дадалд суралцах ёстой байна.

Гадаадын өндөр хөгжилтэй орнуудад крантны усаа шууд хэрэглэдэг. Бид ч цаашид зэсэн хоолойгоор усаа дамжуулдаг болох ёстой юм билээ. 

Манай улсад 1980-2000 онд баригдсан шугамуудыг солих хэрэгтэй. Миний санаж байгаагаар 3, 4-р хорооллын шугамуудыг жил бүр сольж байх юм. Зам бариад, ухдаг. Дараа жил нь дахиад сольдог. Яаж байгаа юм бэ гэхээр шугамыг нь сольж байна л гэдэг жишиг тогтсон байна. Энэ бол цэвэр менемжентгүй, удирдлагын уялдаагүй байдалтай холбоотой. Иймд яамд, холбогдох газрууд хоорондоо нэгдсэн уялдаатай ажиллах хэрэгтэй гэв. 

 

---