АНУ-ын Төлөөлөгчдийн танхим Украинд 40 тэрбум ам.долларын нэмэлт тусламж үзүүлэх тухай хуулийн төслийг өнгөрөгч мягмар гарагт баталжээ.

Уг хуулийн төсөл нь шаардлагатай олонхын саналыг авсан бөгөөд одоо тус улсын Сенатад шилжүүлэх юм. Хэрэв Сенатын зүгээс ч мөн энэхүү тусламжийг баталбал Ерөнхийлөгч Жо Байден гарын үсэг зурж, эцсийн байдлаар баталгаажуулах билээ.

Ноён Байден эхлээд 33 тэрбум ам.долларын нэмэлт санхүүжилтийг хүссэн бөгөөд хууль тогтоогчдыг цаг алдалгүй ажиллаж, хуулийн төслийг шуурхай батлахыг уриалсан. АНУ-аас өмнө нь Украинд илгээсэн бүх нөөц дууссан тул шинэ тусламжийн багц яаралтай хэрэгтэй байгаа ба үгүй бол дэмжлэгээ бүрмөсөн зогсоох шаардлагатай аж.

Тэгвэл тус улсын Конгресс энэхүү шинэ багцыг 40 тэрбум ам.доллар болгож өсгөсөн бөгөөд байлдааны техник хэрэгсэл, хүнсний тусламжийн хэмжээг нэмэгдүүлэхийг санал болгосон байна. Ерөнхийдөө, уг хуулийн төсөл нь Киевт цэрэг, эдийн засаг, хүмүүнлэгийн тусламж үзүүлэхэд шаардагдах хөрөнгийг хуваарилах зорилготой юм.

Эх сурвалж: TASS

---