Кубын нийслэл Хавана хотын Саратога зочид буудалд өнгөрсөн баасан гарагт хүчтэй дэлбэрэлт болсны дараа гал сөнөөгчид нурангид дарагдсан иргэдийг гаргаж авахаар ажилласаар байна.

Уг дэлбэрэлтийн улмаас амиа алдсан хүний тоо 35-д хүрсэн бөгөөд хохирогчдын дунд дөрвөн хүүхэд, жирэмсэн эмэгтэй болон барилгын хажуугаар явж байсан испани жуулчин байжээ. Мөн олон хүн гэмтэж бэртсэн ба 24 хүн одоог хүртэл эмнэлэгт хэвтэн эмчлүүлж байгаа юм.

Тус улсын хамгийн тансаг таван одтой зочид буудлуудын нэг болох Саратогагийн гадна байсан шатахуун тээвэрлэгч автомашины улмаас дэлбэрэлт үүссэн гэж албаныхан таамаглаж байгаа билээ. 19-р зууны үеийн энэхүү зочид буудалд засварын ажил хийгдэж байсан тул амиа алдсан хохирогчдын ихэнх нь барилгын болон зочид буудлын ажилтнууд байжээ.

Аврагчид өнгөрөгч даваа гарагт нуранги дороос дөрвөн хүний ​​цогцсыг гаргаж авсан бөгөөд бүх хохирогчийг олох хүртэл аврах ажиллагааг үргэлжлүүлнэ гэж бүс нутгийн эрх баригчид мэдэгдсэн юм. Орон нутгийн хэвлэлүүдийн мэдээлснээр, тус барилгын хонгилд гацсан зарим хүн дэлбэрэлтээс амьд гарсан байж магадгүй ч албаныхан илүү олон хүний ​​цогцсыг олно гэж эмээж байна.

Эх сурвалж: BBC

---