Цэцэрлэгийн газраа булаалгасан 1000 хүүхдийн эцэг, эхийн төлөөлөл хэвлэлийн хурал хийж, суулт зарлахаар болсноо мэдэгдлээ. 

1000 хүүхдийн эцэг, эхийн төлөөлөл, иргэн Г.Болорсүх:

-Нийслэл хот 1.3 сая хүн амтай. Сүхбаатар дүүргийн 9-р хороонд 3300 орчим сургуулийн өмнөх боловсрол /СӨБ/-ын хүүхдүүд амьдарч байна. Гэтэл тэнд улсын хэмжээний нэг ч цэцэрлэг байдаггүй. Энэ нь хүүхдийн суурь боловсрол эзэмших эрхийг ноцтойгоор зөрчиж байна. Эцэг, эхчүүд хүүхдээ хувийн цэцэрлэгт өгөх, өөрсдөө харах зэргээр өдөр хоногийг өнгөрөөж байна. 

СБД-ийн 9-р хорооны удирдлагуудаас энэ талаар тодруулахад "Цэцэрлэг барих газар байхгүй" гэсэн. Гэтэл хүүхдийн цэцэрлэг барих газарт 160 айлын 16 давхар барихаар болжээ. Цэцэрлэг барина гэж тогтсон газарт орон сууц барьж байна. Энэ бүх байдлын улмаас эцэг, эхчүүдийн төлөөлөл бид суулт зарлахаас өөр аргагүй боллоо.

УИХ-д СБД-ээс сонгогдсон гурван гишүүнд шаардлага хүргүүлсэн ч хариу ирээгүй байна. Мөн, СБД-ийн 9-р хороонд өдөр бүр шинээр барилга ашиглалтад орж байхад ганцхан өрхийн эмнэлэгтэй. Энэ нь хүрэлцээгүй байна.

Цэцэрлэгт явсан, яваагүй хүүхдийн төлөвшил өөр байдаг. Цэцэрлэгийн насны хүүхдийн үгийн сан 2000 байх ёстой байтал одоо 300-400 хүрэхгүй байна гэх судалгаа байна. Нийгэмд бэлтгэгдэх ёстой СӨБ болон суурь боловсрол алдагдсан байна. 

Гэртээ хүүхдээ хараад сууж байгаа эцэг, эхэд амьдралын баталгаа алга. Үүнийгээ дагаад ядуурлын түвшинг нэмэгдүүлж байна. Тиймээс цэцэрлэг зайлшгүй байгуулах ёстой гэв.

---