УИХ-ын гишүүдийн дийлэнх нь, Засгийн газрын кабинетаас хоёр сайд, МАН-ын Удирдах зөвлөлийн гишүүдийн 40 хувь (Ж.Мөнхбатын хэлснээр) нь Жидүдсэн нь илрээд байна. Системтэй, нарийн зохион байгуулалттай, кнопны шагнал болгож 950, 950-аар тараасан нь тодорхой болоод байгаа.

Гэтэл хэрэг нь илрэнгүүт Ерөнхий сайд У.Хүрэлсүх шударга, үнэний сүх эргүүлж эхэлсэн нь инээдтэй хэрэг шүү. Үнэн гээчийн үзүүр олдохоо байж, шударга бус байдалд бухимдсан зарим хүн түүнийг дэмжиж байгаа нь хүн итгэлээ гээхээрээ хэнд ч хамаагүй итгэх гээд байдгаар тайлбарлагдана.

У.Хүрэлсүхийн Засгийн газартай хариуцлага тооцох ёстой гэдгийг бүгд ярьж байгаа. Б.Батзоригийг УИХ-ын гишүүнээс чөлөөлж, хууль хяналтын байгууллагаар шалгуулах ёстой байсан. Яаманд бүгээд, Төрийн ордонд харагдахаа больсон Янгугийн Содбаатар сайд хийх ёс суртахууны эрхгүй хүн учир түүнийг мөн адил сайд, гишүүний суудлаас нь огцруулж, хууль хяналтын байгууллагад тушаах ёстой. Зээл авсан албан тушаалтнууд төрийн босгоор дахин алхах эрх үгүй. 

Жирийн иргэдэд Жижиг дундын зээл олддоггүй өдий хүрсэн. Жирийн иргэд их мөнгө хүсдэггүй, дээд тал нь 10 сая төгрөг байхад амьдрал ахуйгаа өөд татах аж ахуйг эрхлээд явах хүсэлтэй байдаг. Гэтэл эрх мэдэлтнүүд албан тушаалаа ашиглан бүгд тэнцүүхэн хувааж авсан нь илэрлээ. Б.Батзориг гэдэг хүн дур мэдэн үүнийг шийдсэн гэдэгт хэн ч итгэхгүй. Ерөнхий сайд У.Хүрэлсүх энэ талаар огт мэдээгүй байсан гэдэгт ч хэн ч итгэхгүй.

Хулгайчийн хулгай нь илрэхээр хулгайчийг бариарай гэж орилдог шиг У.Хүрэлсүх шударга үнэний сүх эргүүлээд эхэлснийг буруушааж, МАН-ын 27 гишүүн огцруулах асуудлыг дэвшүүлэн тавьсан. Байдал бишдэнгүүт Босоо хөх монголчууд хэвлэлийн хурал хийлээ. УИХ-ын даргыг огцруулахаар Үндсэн хуулийн цэцэд хүсэлт илгээлээ. Цагдаа, АТГ руу бооргон дайрууллаа. Эцэст нь, эх орон, ард түмэн гэсэн халхавч дор У.Хүрэлсүх орж нуугдаад байна.

Ерөнхийлөгчийн сошиал баг ард нь ажиллаж байгаа учир тэр шударга үнэний дуу хоолой болж харагдаж байна. Үнэндээ, Засгийн газар огцрох Монголд байдаг л асуудал болсон (Үндсэн хуулиа өөрчлөхгүй бол). Сайдын суудал мөнх биш гэдгийг бүгд мэддэг болсон. Сайдын суудлаас буугаад амиа егүүтгэсэн хүн Монголд байхгүй. Гэтэл У.Хүрэлсүхэд ийм биш байна.

Тэр суудлынхаа төлөө зууралдаж болох бүхэнтэйгээ зууралдаж, хөлд нь намаа, улс орноо чирээд байна. Ямар их үнэтэй суудал вэ?

 

 

 

 

---