УИХ-ын нэгдсэн чуулган өглөө 10:00 цагт эхэллээ. 11:00 цагийн үед  75 гишүүн ирэх ёстойгоос 71 гишүүн ирсэн байсан.

Харин дөнгөж саяхан УИХ-ын гишүүн Д.Лүндээжанцан, Д.Мурат нар хүрэлцэн ирсэнээр 73 гишүүнтэйгээр хуралдаж байна.

Засгийн газрыг огцруулах саналыг гаргасан МАН-ын 27 гишүүн дээр Ардчилсан намын бүлгийн 9 гишүүн нэмэгдэж байсан ч тус бүлгийн гишүүн Ж.Батзандан, Л.Болд нар Засгийн газрыг дэмжинэ гэдгээ илэрхийлээд байгаа. Өөрөөр хэлбэл, Засгийн газрыг огцруулахгүй гэсэн МАН-ын 35 гишүүн дээр дээрх 2 гишүүн нэмэгдсэн ч саяхан сайдын албан тушаалаас огцорсон Б.Батзориг гишүүн "гадаадад яваа" гэх шалтгаанаар ирсэнгүй. 

Харин Засгийн газрыг огцруулах саналтай МАН-ын 27 гишүүн дээр Ардчилсан намын бүлгийн 7, МАХН-аас сонгогдсон гишүүн О.Баасанхүү нар нэмэгдэж 35 болсон ч Г.Мөнхцэцэг гишүүн "гадаад явсан" тул 34 кноптой болжээ. 

Тооны харьцаа 34:36 байна. УИХ-ын гишүүн С.Жавхлан аль талд саналаа өгөх нь тодорхойгүй байгаа аж. 

---