Коронавирусээр өвчлөн, эмнэлэгт хэвтсэн хүмүүсийн сэтгэн бодох чадварт 20 насаар хөгширсөнтэй харьцуулахуйц бэрхшээл тулгарч болзошгүйг судалгаагаар тогтоожээ.

Их Британийн эрдэмтдийн тооцоолсноор, эмнэлэгт хэвтсэний дараа шинж тэмдэг илэрсэн өвчтөнүүдийн зөвхөн гуравны нэг орчим нь жилийн дараа бүрэн эдгэрсэн байна. Харин ихэнх өвчтөний биеийн үйл ажиллагаа, сэтгэхүйн чадвар нь бага зэрэг л сайжирсан аж. Үүнээс гадна, зарим өвчтөний сэтгэн бодох чадвар нь буурсаар байсныг шинжээчид дэлгэсэн юм.

Кембрижийн их сургуулийн профессор, уг судалгааны ахлах Дэвид Менон энэ талаар "Ковид нь хүний тархи, сэтгэхүйн үйл ажиллагаа, сэтгэл зүйн эрүүл мэнд зэрэг олон зүйлд нөлөөлж, асуудал үүсгэдэг. Гэхдээ хэрэв та вакцинжуулалтад бүрэн хамрагдвал хүндээр өвчлөхгүй бөгөөд эдгээр асуудал мөн багасах болно" хэмээн тайлбарлажээ.

Менон болон түүний хамтрагчид эмнэлэгт хэвтээд зургаан сар болж буй 46 өвчтөнд сэтгэхүйн шинжилгээ хийсэн бөгөөд үр дүнг нь цар тахлаар огт өвчлөөгүй 460 хүний ​​үзүүлэлттэй харьцуулсан байна. Ийнхүү дүн шинжилгээ хийж үзэхэд, коронавирусийн халдварын улмаас эмнэлэгт хэвтсэн хүмүүс сэтгэхүйн тодорхой бэрхшээлтэй болж, тэр дундаа мэдээллийг боловсруулах хурд нь багассан байжээ.

Сэтгэн бодох чадварт гарсан энэхүү өөрчлөлтийн хэмжээ нь дунджаар 50-70 насны хүмүүсийн сэтгэхүйн бууралттай ижил түвшинд байсан аж. Энэ чиглэлээр үргэлжлүүлэн судлах нь ийм төрлийн асуудлаас урьдчилан сэргийлэх үр дүнтэй эмчилгээг бий болгож, цаашлаад одоогийн өвчтөнүүдийг эмчлэхэд тусална гэж Дэвид Менон онцолсон юм.

Эх сурвалж: The Guardian

---