Хятадын Шанхай хотын ахмад настны асрамжийн газрын эмч нар нэгэн өвчтөнийг нас барсан гэж андууран, шарил хадгалах газар руу шилжүүлэхээр зэхэж байх үеэр моргийн ажилтнууд уг өвчтөнийг амьд байгааг анзаарсан байна. Өнгөрөгч ням гаргийн үдээс хойш болсон энэ явдлын гэрч бичлэг хийж, олон нийтийн сүлжээнд байршуулсан нь тус улс даяар шуугиан тариад байгаа юм.

Бичлэгээс харахад, хамгаалалтын хувцас өмссөн ажилтнууд "цогцос"-ыг фургоноос гарган, шалгасан бөгөөд удалгүй нэг нь "Амьд байна! Харав уу? Амьд!" гэж дуу алдсан бол өөр нэг ажилтан "Түүнийг дахиж битгий бүтээ!" гэж хэлжээ. Ингээд шарил хадгалах газрын ажилтнууд асрамжийн газрын эмч нарт мэдэгдсэний эцэст тус өвчтөнийг буцаагаад дотогш нь оруулсан байна.

Энэхүү явдал Шанхайн оршин суугчдыг ихэд цочирдуулж, албаныхны хэрэгжүүлж буй чанга хатуу хязгаарлалтуудын эсрэг хөдөлгөөнийг улам өдөөгөөд байгаа юм. Сүүлийн таван долоо хоногийн турш хөл хорионд ороод буй тус хотын эмнэлгийн тогтолцоо хэт ачаалалд орсон нь үүгээр харагдаж байгааг олон иргэн онцлон, санаа зовнилоо илэрхийлж байна.

Тэгвэл Путуо дүүргийн захиргаанаас энэхүү хэргийг баталсан бөгөөд мөрдөн байцаалтын ажиллагааг эхлүүлж, зургаан хүнийг шалгаж буйгаа зарлажээ. Шанхай хотын Хяналтын хороо болон Сахилгын хяналтын төв хорооноос мэдээлснээр, холбогдох асрамжийн газрын дарга, нэг эмч болон бусад гурван албан тушаалтныг үүрэгт ажлаас нь чөлөөлж, мөрдөн байцаалтад хамруулсан ба орон нутгийн намын өөр нэг албан тушаалтныг мөн саатуулсан аж.

Түүнчлэн, асрамжийн газрын зүгээс албан ёсоор уучлал гуйсан бол шарил хадгалах газрын удирдлагууд тухайн өвчтөнийг амьд байгааг анзаарсан ажилтнуудаа магтаж, тус бүрийг нь 5,000 юаниар шагнасан байна.

上海新长征福利院把还活着的老人装进尸袋，要送去殡仪馆火化，被运尸体的殡仪馆工作人员发现：“活的！”看来这是嫌上海老人死得还不够多，烧死活人不算死于新冠就行。 pic.twitter.com/O6Zn5qV76L

— 方舟子 (@fangshimin) May 1, 2022

Эх сурвалж: The Guardian

---