Улсын Их Хурлын гишүүн Н.Учрал зарим гишүүдийн хамт Улсын Их Хурлын дарга Г.Занданшатарт Эмийн чанар, хяналтын тогтолцооны талаар “Хянан шалгах түр хороо" байгуулах тогтоолын төслийг өргөн барилаа.

УИХ-ын гишүүн Н.Учрал:

-Дотоодын зах зээлд байгаа эм өндөр хөгжилтэй орны эмтэй орц найрлагын хувьд ижил боловч үйлчилгээний нөлөөлөл харилцан адилгүй байгаа тухай иргэдийн зүгээс олон гомдол санал илэрхийлсээр байдаг. Тиймээс Эмийн чанар, хяналтын тогтолцооны талаар “Хянан шалгах түр хороо" байгуулах тогтоолын төслийг парламентын 21 гишүүн УИХ-ын даргад өргөн мэдүүллээ.

2014 онд төрөөс эмийн талаар баримтлах бодлогыг баталсан байдаг. Гүйцэтгэлийн дүгнэлтийг Үндэсний аудитын газраас хийсэн. Тус газрын дүгнэлтэд 44 ААН, эм эмнэлгийн хэрэгсэл үйлдвэрлэх 63 тусгай зөвшөөрөлтэй байгууллага байгаагаас 84.1 хувь нь ДЭМБ-аас тавигддаг шаардлагыг хангаагүй, стандартын шаардлага хангаагүй эм үйлдвэрлэх эрсдэлтэй гэж үзжээ.

Мөн, эмийн чанар, сорьцод хийсэн шалгалтаар манай улсын дотоодод үйлдвэрлэгдэж байгаа эмийн 18.6 хувь, импортын эмийн 6.1 хувь нь стандартын шаардлага хангаагүй байна. Мөн ЭМД-аар хөнгөлөлттэй олгож байгаа эмийн 10 хувь нь чанаргүй байх эрсдэлтэй гэж үзсэн байна. Бүхэлд нь дүгнээд хэлэхэд зах зээлд байгаа эмийн 14 хувь нь стандартын бус, 19 хувийг бүртгэлгүй эм эзэлж байна гэсэн дүгнэлт гарсан байна. 1965 онд байгуулагдсан Эм шалгах лаборатори 2015 онд нэр нь өөрчлөгдөөд Эмийн хяналтын лаборатори нэртэйгээр үйл ажиллагаа явуулж байгаа. Тус газрын тоног төхөөрөмж эвдэрсэн, зарим урвалж нь байхгүй.

Эмийн чанар, хяналтын тогтолцооны талаар Хянан шалгах түр хорооноос хянан шалгах шинжээч томилно. Дотоодын зах зээлд үйлдвэрлэж байгаа болон импортоор орж ирж буй эмүүдэд сорьцын шалгалт хийнэ. Эмийн үйлдвэрүүдийн эм үйлдвэрлэх процесс нь стандартын шаардлага хангаагүй бол шаардлагыг тавих ёстой гэв.

---