Европын Холбоо ОХУ-ын газрын тосны эсрэг яаралтай хориг тавихыг Герман улс дэмжихэд бэлэн байгаагаа зарлажээ. Москвагийн эрчим хүчний хамгийн том хэрэглэгч болох тус улсын албан ёсны байр суурь ийнхүү өөрчлөгдсөнөөр Европ ирэх хэдэн хоногийн дотор ийм хориг арга хэмжээ авах боломжтой болж байгаа юм.

Оросын орлогын хамгийн том эх үүсвэр болох эрчим хүчний экспорт нь Барууны орнуудын одоог хүртэлх хориг арга хэмжээнд бараг багтаагүй байсан билээ. Тиймээс Европын орнууд Кремлийн дайны үйл ажиллагааг санхүүжүүлж, Москвад өдөр бүр олон зуун сая евро илгээж байгаа гэж Киев буруушаасан.

Тэгвэл Германы Эдийн засгийн сайд Роберт Хабек өнгөрөгч даваа гарагт Брюссельд ЕХ-ны төлөөлөгчидтэй уулзахдаа "Герман улс газрын тосны хоригийг даван гарах боломжтой байдалд бид хүрч чадсан. Гэхдээ энэ нь үр дагаваргүй байна гэсэн үг биш" хэмээн мэдэгджээ. ЕХ-ны орнуудын Элчин сайд нар ирэх лхагва гарагт уулзахдаа газрын тосны хориг арга хэмжээний талаар хэлэлцэх аж.

Украиныг дэмжих тал дээр Барууны бусад удирдагчаас илүү болгоомжтой хандаж байгаа Канцлер Олаф Шольцийг хатуу байр суурь баримтлахыг олон хүн шахаж байгаа билээ. Иймээс тэрээр энэ асуудлаар хамгийн сүүлд мэдэгдэл хийхдээ Ерөнхийлөгч Владимир Путин Украинтай энхийн гэрээ байгуулах хүртэл хориг арга хэмжээг хэрэгжүүлнэ гэж тэмдэглэсэн юм.

Эх сурвалж: Reuters

---