Нүүрс тээвэрлэлт зогссоны улмаас манай улс өдөрт дунджаар 6.6 тэрбум төгрөг алдаж байна. Нүүрс тээвэрчдийн тэвчээр алдагдсан учир өнөөдөр Засгийн газарт шаардлага хүргүүллээ. БНХАУ-ын талаас нүүрсний импортыг тэглэсэн, нүүрсний өндөр байгаа нь бидэнд маш том боломжийг олгож байгаа ч үүнийг огт ашиглахгүй байна гэж буруушаав. 

Тээвэрчдийн төлөөлөл Г.Пүрэвжав: 

-Монгол улсын экспортын гол орлогыг бүрдүүлдэг нүүрс тээвэр гацсан хэвээр байна. Монгол улсын Засгийн газраас энэ жил 36.5 сая тонн нүүрс импортолно гэсэн зорилт тавьсан. Гэтэл энэ оны гурван сарын байдлаар дөнгөж 2.7 сая тонн нүүрс импортлоод байна.

Гэтэл гадаад зах зээл дээр нүүрсний үнэ өндөр байна. Монгол нүүрсний гол худалдан авагч БНХАУ-ын талаас нүүрсний импортыг тэглэсэн энэ алтан боломжийг бид ашиглаж чадахгүй, өдөрт 6.6 тэрбум төгрөгийн орлогоо алдаж байна. Сар бүр 180 тэрбум төгрөг алдаж байна. Монгол улс арчаагүй байна. 

Зам тээвэр, хөгжлийн сайд Л.Халтар тушаал гаргаж 3 сарын 31-нээс Цогцэций-Чойр чиглэлийн нүүрс тээврийн замыг хаасан. Үүнээс болж Чойрт их хэмжээний нүүрс хуримтлагдаад байна. Үүнийг гацаанаас гаргах шаардлагыг бид өгч байна. 

Мөн, Эрээнд гацаад байгаа нүүрсийг хурдан гаргамаар байна. Энэ нь бидний цэвэр хариуцлагагүй байгаатай холбоотой. Манай гаальд хортой элементийн лаборатори байдаггүй учир Хятадын талд шинжлүүлдэг. Хортой бодис стандартаас хэтэрсэн тохиолдолд авахгүй байгаа. Үүнийг төр засаг гэж байдаг бол шийдмээр байна. Вагон явуулах боломжтой гэдгээ УБТЗ мэдэгдсэн. Шийдсэнээр Засгийн газар, тээвэрчид, ард түмэн бүгд хожно гэв.

---