ОХУ Украинд явуулж буй цэргийн ажиллагаагаа энэ сарын 9-нд тохиох Ялалтын баяраас өмнө дуусгах гэж зүтгэн, боломжгүй зорилт тавихгүй гэж тус улсын Гадаад хэргийн сайд Сергей Лавров мэдэгджээ.

Италийн "Mediaset" телевиз түүнээс энэ талаар тодруулахад тэрээр "Манай цэргүүд тусгай ажиллагаагаа тодорхой өдөрт хязгаарлаж, аргацаасан алхам хийхгүй ба үүнд Ялалтын баяр ч хамаарна. Бид 5 дугаар сарын 9-ний өдрийг уламжлал ёсоор ёслол төгөлдөр тэмдэглэх болно" хэмээн хариулсан байна.

Түүний хэлснээр, Оросын цэргийн хүчний Украин дахь тусгай үйл ажиллагааны явц нь юуны түрүүнд "энгийн иргэд болон орос цэргүүдийн эрсдэлийг бууруулах хэрэгцээ шаардлагаас" хамаарах аж. Тодруулбал, энэхүү ажиллагаа нь энгийн иргэдийн аюулгүй байдлыг хангаж, Украины талаас ОХУ-д ямар нэгэн аюул занал учруулахаас сэргийлэх зорилготой гэж тэрээр тэмдэглэжээ.

Ноён Лавров энэ талаар "Украинаас довтолгооны зэвсэг болон нацист үзэл санаа тархах эрсдэлтэй байгаа ч Барууныхан үүнийг үгүйсгэхийг оролдож байна" хэмээн онцолсон юм.

Эх сурвалж: TASS

---