Израилын Ерөнхий сайд Нафтали Беннетт татвар төлөгчдийн мөнгөнөөс сар бүр 7,400 ам.долларыг гэр бүлийнхээ хоол хүнсний зардалд зарцуулдаг гэх мэдээлэл ил болж, олон нийтийн зүгээс ихээхэн шүүмжлэл дагуулаад байсан билээ. Тэгвэл ноён Беннетт цаашид энэхүү зардлыг хувиасаа төлнө гэж мэдэгджээ.

Тус улсад өнгөрсөн амралтын өдрүүдэд цацагдсан телевизийн нэвтрүүлэгт, Ерөнхий сайдын гэр бүлийг татвар төлөгчдийн их хэмжээний мөнгөөр үйлчилгээний ажилтнуудаа цалинжуулж, хүргэлтийн хоол захиалдаг гэж буруушаасан юм. Удалгүй Нафтали Беннетт эдгээр зардлаа дэлгэж, татвар төлөгчдийн мөнгөнөөс сар бүр 26,400 ам.доллар зарцуулдгаас 7,400 ам.долларыг нь хоол хүнсэнд зориулдаг гэж мэдүүлсэн байна.

Түүний хэлснээр, энэ нь бүх дүрэм журамд нийцсэн явдал аж. Түүнчлэн, өмнөх Ерөнхий сайд Бенжамин Нетаньяху сар бүр 84,300 ам.доллар буюу үүнээс гурав дахин их мөнгө зарцуулдаг байсныг Ерөнхий сайд Беннеттийн ажлын алба онцолжээ.

Ноён Беннетт өөрийн олон нийтийн сүлжээндээ байршуулсан албан ёсны тайлбартаа "Би Ерөнхий сайдын албан тушаалыг хаших болсноор ийм төрлийн зардал эрс багассан. Намайг гедонист үзэл баримтлалтай хүн гэж харуулахыг завдсан энэ оролдлого зүгээр л инээдтэй санагдаж байна" хэмээн бичсэн юм.

Тэгвэл тэрээр өнгөрөгч лхагва гарагт иргэдийн шүүмжлэлийг хүлээн зөвшөөрч, гэр бүлийнхээ хоолны зардлыг өөрөө төлөхөөр шийдсэнээ зарлажээ. Нафтали Беннетт энэ талаар "Хэдийгээр бидний үйлдэл дүрэм журмын дагуу байсан ч олон нийтэд ямар сэтгэгдэл төрснийг би ойлгож байна. Тиймээс одооноос эхлэн гэр бүлийнхний маань хоолны бүх зардлыг миний хувийн данснаас гаргахыг би ажлын албаны гишүүддээ үүрэг болгосон. Би энэ албан тушаалд мөнгө, хүндэтгэлийн төлөө биш, харин Израилын иргэдэд бүх хүч чадлаараа үйлчлэхийн тулд зүтгэж байгаа ба цаашид ч ийн ажиллах болно" гэж тэмдэглэсэн байна.

Эх сурвалж: BBC

---