ОХУ-ын "Газпром" эрчим хүчний компани Польш, Болгар улсуудад өнөөдрөөс эхлэн байгалийн хий нийлүүлэхээ зогсооно гэж мэдэгджээ.

Польшийн төрийн мэдлийн "PGNiG" байгалийн хийн компанийн хэлснээр, Оросын тал хийн нийлүүлэлтээ орон нутгийн цагаар 08:00 цагаас зогсооно гэж мэдэгдсэн байна. Ерөнхийлөгч Владимир Путин "нөхөрсөг бус" орнуудыг байгалийн хийн төлбөрөө рублиэр төлөхийг шаардсан бөгөөд татгалзсан улсуудын нийлүүлэлтийг бууруулна гэж өмнө нь анхааруулаад байсан билээ. Тэгвэл эдгээр хоёр улс төлбөрөө рублиэр төлөхөөс татгалзсан аж.

"PGNiG" компани нь хийн импортынхоо дийлэнх хувийг "Газпром"-оос авдаг ба энэ оны эхний улиралд импортынхоо 53 хувийг Оросоос худалдаж авсан байна. Тус компанийн зүгээс Оросын талыг гэрээгээ зөрчсөн гэж буруушаагаад, хийн урсгалаа сэргээх арга хэмжээ авна гэж тэмдэглэсэн юм.

Харин байгалийн хийн нийт хангамжийнхаа 90 гаруй хувийг Оросоос авдаг Болгар улс өөр эх үүсвэр хайх болсон ч одоогоор иргэдийн хэрэглээнд хязгаарлалт тавих шаардлагагүй гэж онцолжээ. Болгар улс "Газпром"-той байгуулсан гэрээний дагуу хүлээсэн үүргээ биелүүлж, шаардлагатай бүх төлбөрийг хийсэн гэж тус улсын Эрчим хүчний яам мэдэгдсэн юм.

ОХУ-ын энэхүү үйлдэл нь Москваг "ямар ч төрлийн бизнесийн найдвартай түнш биш" гэдгийг нотолж байгаа бөгөөд Герман зэрэг Европын бусад орон Оросын эрчим хүчний импортыг хориглохыг хэрэгтэйг Польшийн Гадаад хэргийн дэд сайд Марчин Псыдач хэлжээ. Түүнчлэн тус улс нь энэ оны эцэс гэхэд Оросын байгалийн хийн импортоо бүрэн зогсоохоор төлөвлөж байсан аж.

Эх сурвалж: BBC

---