Умард Солонгосын удирдагч Ким Жон Ун өнгөрөгч даваа гаргийн орой болсон цэргийн парадын үеэр үг хэлэхдээ, цөмийн зэвсгийн нөөцөө нэмэгдүүлнэ гэж амлажээ.

Тус улсын зэвсэгт хүчин үүсэн байгуулагдсаны 90 жилийн ойд зориулсан уг парадын үеэр "Хвасон-17" тив хоорондын баллистик пуужинг олон нийтэд танилцуулсан байна. Умард Солонгосын хамгийн томд тооцогддог тус пуужинг өнгөрөгч 3 дугаар сард туршсан нь 2017 оноос хойших ийм төрлийн анхны туршилт болсон билээ. Энэ явдал нь олон улсын зүгээс ихээхэн шүүмжлэл дагуулсан бөгөөд АНУ-ын эрх баригчид Умард Солонгосын эсрэг хэд хэдэн хориг арга хэмжээ авсан юм.

Гэвч Ким Жон Унд эдгээр арга хэмжээ нь нөлөөлөхгүй байгааг шинжээчид онцолж байна. Хэрэв халдлагад өртвөл хариу цохилт өгнө гэдгээ өмнө нь онцолж байсан тэрээр энэ удаагийн цэргийн парадын үеэр "Бид улс орныхоо цөмийн чадавхыг аль болох хурдан бэхжүүлж, хөгжүүлэх алхмуудыг үргэлжлүүлэн хэрэгжүүлэх болно. Цөмийн зэвсгүүд хэзээ ч ашиглахад бэлэн байх ёстой. Манай улсын цөмийн зэвсэг нь дайнаас урьдчилан сэргийлэх хэрэгсэл байсан ч өөр зорилгоор ашиглах боломжтой" хэмээн мэдэгджээ.

Өмнөд Солонгосын шинэ Ерөнхийлөгчөөр сонгогдоод буй Юн Сок Ёл Умард Солонгосын цэргийн үйл ажиллагааны эсрэг хатуу байр суурь баримтлахаа илэрхийлсэн нь хоёр улсын харилцааг улам хурцатгаад байгаа билээ.

Эх сурвалж: BBC

---