БНСУ-ын шинэ Ерөнхийлөгчөөр сонгогдсон Юн Сок Ёл Хөх ордныг ард түмэндээ буцаан өгч, Ерөнхийлөгчийн албан ёсны өргөөг нүүлгэнэ гэж амласны дагуу тус ордон ирэх 5 дугаар сарын 10-наас олон нийтэд нээлттэй болохоор болжээ.

Ерөнхийлөгч Юн тангараг өргөх тус өдрийн 10:00 цагаас хойш иргэдийг Хөх ордонд нэвтрэхийг зөвшөөрнө гэж тус улсын Шилжилтийн хороо болон Үндэсний цагдаагийн газрын албан тушаалтнууд мэдэгдсэн байна. Тодруулбал, өдөрт нийт 39 мянган иргэнийг хүлээж авах бөгөөд нэг дор 6,500 хүртэлх хүн нэвтэрч, хоёр цагийн турш ордонтой танилцах боломжтой аж.

Харин дараагийн өдрөөс нь эхлэн Хөх ордон 07:00-19:00 цагийн хооронд нээлттэй байх бөгөөд эхний цуврал арга хэмжээ нь 5 дугаар сарын 20-н хүртэл үргэлжилнэ гэж албаныхан хэлсэн юм. Ерөнхийлөгчийн ордноор аялах хүсэлтэй иргэд цахимаар урьдчилж захиалга өгөх шаардлагатай гэжээ.

Түүнчлэн, Хөх ордны ард байрлах Букак уулын өмнөд хэсэг 1968 онд Умард Солонгосын цэргүүдийн халдлагад өртсөнөөс хойш олон нийтэд хаалттай байсан бол мөн эргээд нээгдэж байгаа аж.

Өмнөд Солонгосын Ерөнхийлөгчийн ордныг нүүлгэх нь ноён Юны сонгуулийн кампанит ажлын гол амлалтуудын нэг байсан билээ. Одоо тэрээр шинэ оффисоо Сөүл хотын төвд байрлах Батлан ​​хамгаалах яамны байранд шилжүүлэн байршуулахаар төлөвлөж байгаа бөгөөд ингэснээр ард түмэнтэйгээ илүү ойр байна гэж үзэж байгаа юм.

Эх сурвалж: Yonhap News Agency

---