БЗД-ийн 21-р хорооны иргэн Ж.Мөнхболд тавилгын бизнес эрхлээд хоёр жил болж байна. Тэрээр гурван хүн цалинжуулдаг. Мэргэжлийн мужаан биш ч амьдралын эрхээр ур чадвараа хөгжүүлэн монгол гэрийн тавилга хийдэг болжээ.

Түүний хувьд Солонгос улсад ажиллаж хөдөлмөрлөж байсан бөгөөд цар тахал гаргахаас өмнө нь ПС тоглоомын газар ажиллуулдаг байжээ. Ингээд өөрт байгаа мөнгөөрөө тавилга хийхээр шийдэн сүүлийн хоёр жил тасралтгүй үйл ажиллагаа явуулж байна.

Өнөөдрийн байдлаар үйлдвэрийн үйл ажиллагаагаа өргөтгөн гэр хорооллын нүүрний хашааг шилэн хорготой болгон өөрийн хийсэн тавилгаа олон нийтэд харуулдаг болжээ.

Иргэдийн хувьд модон хашаа хараад өнгөрөх биш гоё сийлбэртэй тавилга харах нь сэтгэл санааг өргөх байх гэдэг санааг тэрбээр гаргасан байна.

Ж.Мөнхболдын хувьд олсон мөнгөө захирал хэмээн өөртөө илүү наалгүй гурван ажилтандаа ижил тэнцүү хуваан өгдөг гэнэ. Монгол гэрийн авдар 400-600 мянган төгрөгөөр зарагддаг бөгөөд он гарснаар худалдан авалт буурсан гэдгийг дурдлаа. Амьжиргааны түвшин буурч, цалин хөлс нэмэгдэхгүй, өргөн хэрэглээний бараа бүтээгдэхүүний үнэ худалдан авалтад маш их нөлөөлдөг талаар ч тэрбээр нуулгүй хэлсэн юм. Тэглээ гээд өөрийн босгосон үйлдвэрээ зогсоолгүй үйл ажиллагаа явуулах болно гэлээ.

Түүний хувьд сийлбэрийн машинаа ажиллуулж сурахын тулд компьютер дээр программ хэрхэн ажиллуулах талаар хүртэл сурсан гэнэ. Тэрбээр хүн хөдөлмөрлөж чадах юм бол ямар ч ажлыг хийж чаддаг юм шүү гэдгийг залууст захиж хэлсэн юм.

---