Засгийн газрын өнөөдрийн хуралдаанаар Монгол Улсын 2022 оны Төсвийн тухай хуульд өөрчлөлт оруулах тухай болон бусад дагалдах хуулийн төслүүдийг УИХ-д өргөн барьсан. 

Уг хуулийн төсөлд нийгмийн даатгалын шимтгэлээ өөрөө хариуцан төлсөн зарим даатгуулагчийн
шимтгэлийн 50 хувийг буцаан олгох тухай тусгагдсан байна. Өөрөөр хэлбэл, шимтгэл төлөлтийн 50 хувийг буцаан олгохдоо цалингийн хэмжээг харгалзан үзэхээр хуулийн төсөлд тусгажээ. 

Энэ талаар ХНХ-ийн сайд А.Ариунзаяа:

-Өнгөрсөн хугацаанд маш олон санал ирж, бүлэгтэйгээ ярилцсан. Энэ хүрээнд ямар нэгэн байдлаар байгууллагаар хязгаарлах бус цалингийн хэмжээгээр нь хязгаарлах нь зөв гэсэн санал гарсан. Ингээд 1 сая төгрөг ба түүнээс доош цалин, орлогоор Нийгмийн даатгалын шимтгэл төлж байгаа иргэдийн нийгмийн даатгалын шимтгэлийн буцаан олголтыг дараа сард олгох тухай хуулийн төсөлд тусгасан. 

Энэ хууль хэрэгжсэнээр албан журмын нийгмийн даатгал төлөгч 715 мянган хүн, сайн дурын даатгуулагч 147 мянган хүн хамрагдах юм байна. Үүнд улсын төсвөөс нийт 172 тэрбум төгрөг буюу 2022 оны төсөвт 150 тэрбум төгрөг, 2023 оны төсөвт 21 тэрбум төгрөгийг төсөв тавигдаж байна. Нэг ёсондоо, төсвөөс буцаан олголт нь хийгдэнэ гэсэн үг. Ингэснээр иргэн эхлээд шимтгэлээ төлнө, төлсөн хэмжээнээс нь буцаан олголтыг дараа сард нь олгоно. Мөн хувийн данс руу нь шилжүүлнэ гэв. 

 

---