ОХУ-ын цэргийн хүчин Украины зүүн хэсгийн Донбасс бүсийг эзлэхээр дайралтаа эхлүүлсэн гэж Ерөнхийлөгч Владимир Зеленский мэдэгджээ.

Украины аюулгүй байдлын дээд албан тушаалтан Алексей Даниловын хэлснээр, Оросын цэргүүд Донбасс дахь Украины фронтын шугамыг нэвтлэхийг оролдсон аж. Гэвч Оросын арми Киевийг эзлэн авч чадаагүйгээс хойш украйн цэргүүд энэхүү довтолгоог урьдчилсан таамаглаж байсан билээ.

ОХУ-ын цэргийн тусгай үйл ажиллагаа нь эхэндээ Украины томоохон хотуудыг эзлэн авч, Засгийн газрыг нь унагахаар зорьж байсан гэж шинжээчид үзэж байна. Гэхдээ хүчтэй эсэргүүцэлтэй тулгарсны дараа Оросын батлан ​​хамгаалахын албаныхан цэргүүдээ Киев орчмоос шилжүүлж, Донбасс бүс нутгийг "чөлөөлөх"-д чиглүүлэхээр төлөвлөж буйгаа зарласан юм.

Тэгвэл Оросын тал өнгөрөгч даваа гарагт тус хэсгийн хэд хэдэн хотыг пуужин, их буугаар галлаж эхэлсэн бөгөөд улмаар Кременная хотод найман энгийн иргэн амиа алджээ. Харин баруун бүсийн Львов хот дөрвөн удаагийн цохилтод өртсөний улмаас долоон хүн амь үрэгдэж, 11 хүн шархадсан байна.

Ерөнхийлөгч Зеленский даваа гаргийн орой хийсэн мэдэгдэлдээ "Миний бие болон манай цэргүүд газар нутаг, ард иргэдээ хамгаалах болно. Украины ямар ч зүйлийг дайснуудад өгөхгүй" гэж амлажээ.

ОХУ одоогийн байдлаар Луганскийн 93 хувь, харин Донецкийн 54 хувийг хяналтаа аваад байгаа гэж тус улсын эрх баригчид мэдэгдсэн бөгөөд Донбасс хэсэгт үлдсэн Украины цэргүүдийг бүслэхээр оролдоно гэж тэмдэглэсэн юм.

Эх сурвалж: BBC

---