УИХ дахь Ардчилсан намын бүлэг мэдээлэл хийж байна. Ардчилсан намын бүлэг Засгийн газраас авч хэрэгжүүлж буй арга хэмжээ хэр оновчтой тухай болон ОХУ-ын Элчин сайдын мэдээллийн талаар хэлэлцсэн байна.

УИХ дахь АН-ын бүлгийн дарга Д.Ганбат:

- Нэгдүгээрт Хуулиар үнийг тогтворжуулах ажлыг анх удаа Монгол Улсад хийх гэж оролдож байна. Оролдлогууд нь зөв ч арга нь буруу байна. Засгийн газраас татвар багасгах шийдвэрийг өргөн хүрээнд гаргах ёстой гэсэн саналтай байна. НДШ-ийн 50 хувийг буцаан олгох саналыг дэмжиж байгаа. Засгийн газар ажил олгогч, хувийн хэвшлийг дэмжсэн арга хэмжээ хэрэгжүүлэхгүй байна. Хоёр хөршөөс гадна олон улсын хамтын нийгэмлэгийн оронтой ойлголцох хэрэгтэй. Гадаадын зээл тусламжийг зөв зарцуулж, УИХ, ард түмэнд тайлагнах шаардлагатай. Халамж хавтгайрсан бөгөөд эзэндээ очихгүй байна. Үүнийг зохицуулах хэрэгтэй. Зах зээлийн зарчмаараа явах ёстой. Төр, засгийн тэргүүд хөрш орнуудад айлчлал хийж хил гааль боомтын асуудлаа яаралтай шийдвэрлэх хэрэгтэй байна. Мөн энэ хүнд цаг үед гадаадын хөрөнгө оруулалтыг татаж авчирах тал дээр анхаарч ажиллах шаардлагатай гэж үзэж байна.Төрийн албан хаагчдын орон тоо ихэдсэн. Ямар ч хэрэггүй дэд сайд, орлогч дарга гэх олон албан тушаалыг арилгаж, шаардлагагүй сумдыг нэгтгэмээр байна. Энэ бүхнийг оруулсан зөвлөмжийг удахгүй бид Засгийн газарт хүргүүлнэ. Хоёрдугаарт Хөгжлийн банкыг шалгах Хянан шалгах түр хороо байгуулахдаа хэд хэдэн хуулийг зөрчсөн. Цөөнхийн бүлгийн гишүүдийг оруулна гэж заасан ч манай намын хоёрхон гишүүн тус түр хороонд орсон. Энэ тоо дөрвөөс доошгүй байх ёстой, мөн манай бүлгийн саналыг сонсоогүй байна. Иймд тус түр хороо хүчин төгөлдөр бус түр хороо гэж үзэж байна.  Гуравдугаарт Монгол Улсад Украин, ОХУ-ын хооронд үүсээд буй нөхцөл байдлын үед ОХУ-ын нэр хүндтэй албаны хүн Монголд био лаборатори байгуулсан талаар удаа дараа мэдээлэл түгээсэнд Гадаад харилцааны яам өчигдөр мэдэгдэл гаргасан байсан. Үүнээс гадна хөндлөнгийн экспертүүдийг яаралтай урьж, үнэхээр байгаа эсэхийг нягталж, дүгнэлт гаргуулан найрсаг харилцаатай хөршдөө мэдэгдэх хэрэгтэй. Үүнийг зохих байгууллагууд нь яаралтай нягталж шийдвэрлэх хэрэгтэй гэлээ.

---