Хөвсгөл аймгийн цагдаагийн байгууллагын удирдлагуудын хууль бус үйл ажиллагааны талаар хуульч Д.Алтангэрэл өнөөдөр АТГ-ын үүдэнд мэдээлэл хийлээ.

Хөвсгөл аймагт сүүлийн нэг жилийн хугацаанд иргэдийн мөнгийг 30-50 хувиар өсгөж өгнө хэмээн мөнгө завших үйл ажиллагаа явуулж буй "Бэлтэс Мөрөн" ХХК-ийг цагдаа, прокурорын байгууллага шалгалтын үйл ажиллагаа явуулахгүй байгаа тул Авлигатай тэмцэх газар, Цагдаагийн ерөнхий газар, Прокурорын ерөнхий газарт гомдол гаргахаар болсон байна.

Хуульч Д.Алтангэрэл:

-"Бэлтэс Мөрөн" ХХК нь иргэдээс их хэмжээний бэлэн мөнгө авч “нэг сарын хугацаанд таны мөнгийг 30-50 хувь өсгөж өгнө” хэмээн хууран мэхэлж, мөнгө угаах хэрэг сүүлийн нэг жилийн хугацаанд гарч байна.

Өнөөдрийн байдлаар иргэдээс 300 орчим тэрбум төгрөгийг авч эргүүлсэн гэх мэдээлэл байна. Иргэдийг залилж, бэлэн мөнгө авч угааж байгаа явдлыг шалгахыг цагдаа, прокурорын байгууллагад хандсан ч өнөөдрийг болтол хэргийг шийдвэрлэж өгөхгүй байна.

Хөвсгөл аймгийн цагдаа, прокурорынхон хэргийг шалгахгүй, нуун дарагдуулж, өөрсдөө тус газарт мөнгөө эргүүлдүүлсэн байж болзошгүй хэмээн хардаж байна.

Өнөөдрийн байдлаар мөнгөө өгсөн иргэд хохирсон зүйл байхгүй ч нэг л өдөр “Бэлтэс Мөрөн” ХХК мөнгө авч зугтах юм бол иргэд хохирох болно. Иймд хууль хүчний байгууллага иргэдийг хохирохоос өмнө нь мөнгө эргэлдүүлж байгаа “Бэлтэс Мөрөн” ХХК-ийг шалгахыг шаардаж байна гэсэн юм.

---