Их Британийн Ерөнхий сайд Борис Жонсон өнгөрсөн амралтын өдрүүдэд Украины Киев хотод айлчилж, Ерөнхийлөгч Владимир Зеленскийтэй уулзжээ.

Энэхүү айлчлалыг аюулгүй байдлын улмаас олон нийтэд урьдчилж зарлаагүй аж. Украины ард түмэнтэй "эв санааны нэгдлийг баталсан" тус уулзалтын дараа ноён Жонсон "Ерөнхийлөгч Зеленскийн тууштай удирдлага, Украины ард түмний дийлдэшгүй баатарлаг байдал, эр зоригийг үнэлж буйгаа илэрхийлмээр байна. Украин улс саад бэрхшээлийг даван туулж, Оросын цэргүүдийг Киевийн үүднээс түлхэн унагалаа. Их Британи энэ үргэлжилсэн тэмцэлд тэдэнтэй хамт тууштай зогсоно гэдгийн би өнөөдөр тодорхой хэлсэн. Бид энэхүү эмгэнэлт явдлыг эцэс болгож, Украиныг эрх чөлөөтэй, тусгаар тогтносон үндэстний хувьд оршин тогтнож, цэцэглэн хөгжих боломжтой болгохын тулд өөрсдийн цэрэг, эдийн засгийн дэмжлэгийг нэмэгдүүлж, дэлхийн эвслийг уриалах болно" хэмээн тэмдэглэсэн юм.

Үүний хүрээнд, Их Британи улс Украиныг дэмжих зорилгоор 120 хуягт машин, хөлөг онгоцны эсрэг пуужингийн систем илгээнэ гэж мэдэгджээ. Мөн цаашдын эдийн засгийн дэмжлэгийг баталгаажуулснаар Их Британийн олгох зээлийн нийт хэмжээ 770 сая фунт стерлингт хүрсэн байна.

Түүнчлэн өнгөрсөн долоо хоногийн баасан гарагт Европын Комиссын Ерөнхийлөгч Урсула фон дер Лейен болон Европын Холбооны Гадаад бодлогын тэргүүн Жозеп Боррел нар Украинд айлчилж, Ерөнхийлөгч Зеленскийтэй хэлэлцсэн бол Австрийн Канцлер Карл Нехаммер бямба гарагт Киевт ирсэн юм. Харин ноён Жонсон Украин дахь хурцадмал байдал эхэлснээс хойш нийслэл Киевт айлчилсан "Их долоо" бүлгийн гишүүн орнуудын анхны удирдагч болжээ.

Эх сурвалж: BBC

---