Францын Цэргийн тагнуулын газрын дарга, генерал Эрик Видог ОХУ-ын Украин дахь түрэмгийллийг урьдчилан таамаглаж чадаагүй гэх шалтгаанаар халжээ. Уг албан тушаалыг ердөө долоон сарын турш хашсан түүнийг "хангалттай мэдээлэл өгөөгүй", "ажлаа сайн эзэмшээгүй" гэж буруутгасан аж. 

АНУ Оросыг өргөн цар хүрээтэй довтолгоо хийхээр төлөвлөж байгаа гэж зөв үнэлсэн бол Францын тал үүнийг боломжгүй гэж дүгнэсэн билээ. Тэгвэл Францын цэргийн удирдагч үүнд Видог буруутгаж байгааг эх сурвалж хэлсэн байна.

Гэвч цэргийн нэг эх сурвалжийн хэлснээр, Видогийн үүрэг бол "урьдчилан таамаглаж, төлөвлөх биш, харин цэргийн үйл ажиллагааны талаар тагнуулын мэдээлэл өгөх" явдал аж. Өмнө нь генерал Видо ОХУ-д Украинд довтлох арга хэрэгсэл байгаа гэж дүгнэсэн тул "түүний зөв байсан" гэж тус эх сурвалж тэмдэглэжээ.

Францын Зэвсэгт хүчний Жанжин штабын дарга, генерал Тьерри Буркхард тус улсын тагнуулын алба АНУ, Их Британийн тагнуулын мэдээллийн түвшинд хүрч чадаагүйг хүлээн зөвшөөрсөн байна. Тэрээр "ОХУ довтолгоо хийх гэж байгааг америкчууд анхааруулсан бөгөөд тэдний зөв байсан. Харин манай албаныхан Украиныг эзлэн авах нь өндөр зардалтай алхам бөгөөд оросууд өөр сонголт хийнэ гэж үзсэн" хэмээн "Le Monde" сонинд хэлсэн юм.

Үүнээс гадна, Ерөнхийлөгч Эммануэль Макрон ОХУ-ын халдлага эхлэхээс өмнөх өдрүүдэд Ерөнхийлөгч Владимир Путинтэй байнга ярилцаж байсан учир Францын тагнуулын албаны бүтэлгүйтэл нь тус улсыг улам ичмээр байдалд оруулсан гэж шинжээчид онцолжээ.

Эх сурвалж: BBC

---