ОХУ-ын Ерөнхийлөгч Владимир Путины зөвлөхүүд түүнд Украин дахь цэргийн ажиллагааны бодит байдлыг хэлэхээс эмээж байгаа бөгөөд улмаар түүнийг төөрөгдүүлж байгаа гэж АНУ-ын тагнуулын албаныхан мэдэгджээ.

Түүнчлэн Барууны хориг арга хэмжээнүүдийн Оросын эдийн засагт үзүүлэх бүрэн нөлөөг Путинд хэлээгүй гэж албаны эх сурвалжууд тэмдэглэсэн байна. Цагаан ордны хэвлэлийн төлөөлөгч Кейт Бедингфилдийн хэлснээр, Ерөнхийлөгч Путин цэргийн удирдлагууддаа итгэлгүй болсон ба үүний улмаас тэдний дунд хурцадмал байдал үүсээд байгаа аж. Тэрээр "Путины дайн бол Оросыг урт хугацаанд сул дорой болгож, дэлхийн тавцанд улам бүр ганцаардуулсан стратегийн алдаа байсан" хэмээн онцолжээ.

Пентагоны хэвлэлийн төлөөлөгч Жон Кирби "Ийм удирдагч муу мэдээ сонсоод хэрхэн хариу үйлдэл үзүүлэхийг таашгүй" гэж тайлбарласан байна.

Мөн Их Британийн тагнуулын албаны мэдээлснээр, Украин дахь Оросын цэргүүдийн сэтгэл санаа нь доройтож, техник хэрэгсэл нь дутмаг болсон бөгөөд тэд тушаал биелүүлэхээс татгалзаж байгаа аж. Хүнд хэцүү нөхцөл байдалд орсон орос цэргүүд өөрсдийн техник хэрэгслийг хорлон сүйтгэсэн гэж Их Британийн кибер-тагнуулын агентлагийн тэргүүн Жереми Флеминг мэдэгдсэн юм.

Энэ долоо хоногийн эхээр болсон энхийн хэлэлцээрийн үеэр ОХУ-ын төлөөлөгчид Киев болон хойд нутгийн Чернигов хотын эргэн тойронд явуулж буй цэргийн үйл ажиллагаагаа багасгана гэж амласан нь Оросын эрх баригчид Украин дахь нөхцөл байдлыг "маш буруугаар үнэлснээ ухаарч", "өргөн хүрээнд дахин бодолцож үзэж байгаагийн дохио" гэж шинжээчид дүгнэж байна.

Эх сурвалж: BBC

---