Туркийн Истанбул хотноо болсон энхийн хэлэлцээрийн үеэр ОХУ "харилцан итгэлцлийг нэмэгдүүлэхийн тулд" Украины хоёр гол бүс дэх цэргийн үйл ажиллагаагаа "эрс бууруулна" гэж мэдэгджээ.

Украины нийслэл Киев болон хойд хэсгийн Чернигов хотын эргэн тойрон дахь довтолгоог багасгах шийдвэр нь энхийн хэлэлцээрээс бодит ахиц дэвшил гарч байгаагийн анхны шинж тэмдэг юм. Гэхдээ энэхүү амлалт нь хэр өргөн хүрээтэй байх нь тодорхойгүй байгаа бөгөөд Украины тал эргэлзсэн хэвээр байна.

Ерөнхийлөгч Владимир Зеленский Оросын зарим төлөөлөгчийн үгэнд итгэх ямар ч шалтгаан олж харахгүй байгаагаа онцлон, "Бид эерэг дохио харж байгаа ч Оросын их бууны халдлагууд үргэлжилсээр, дэлбэрэлтүүд намжихгүй байна" хэмээн мэдэгджээ.

АНУ-ын албаныхан ч мөн Оросын амлалтыг ямар нэгэн мэдэгдэхүйц өөрчлөлтөд хүргэнэ гэдэгт итгэлгүй байгаагаа тэмдэглэсэн юм. Тус улсын цэргүүд Киевээс холдож байгаа нь ажиглагдсан ч агаараас цохилтууд зогсохгүй байгаа аж.

Өнгөрөгч мягмар гарагт болж өнгөрсөн энхийн хэлэлцээрийн үеэр Украины төлөөлөгчид аюулгүй байдлын баталгааны хариуд төвийг сахисан улс болохыг санал болгожээ. ОХУ-ын зүгээс үүнийг эергээр хүлээж авсан бөгөөд яриа хэлэлцээр практик шатанд шилжсэн гэж мэдэгдсэн байна.

Эх сурвалж: BBC

---